भांगरभूंय | प्रतिनिधी
पणजीः कर्नाटक आनी महाराष्ट्र हांचे मदीं तयार जाल्ल्या टर्फाक लागून आनी हेर हवामानांतल्या बदलांक लागून हवामान खात्यान आयज, फाल्यां आनी परवां (१ एप्रील) राज्यांत पावस पडपाची शक्यताय उक्तायल्या. ह्या तीन दिसांनी दनपरां उपरांत पावस शिरशिरपाची शक्यताय आसा. सोमारा राज्यांतल्या कांय सुवातींनी दम हवामान आशिल्लें. चडांत चड आनी उण्यांत उणें तापमान वाडत वचत उश्णताय चालूच आशिल्ली.
सोमारा पणजेचें तापमान चडांत चड ३४.३ अंश आनी उण्यांत उणें तापमान २५ अंश नोंद जालां. मुरगांवांत चडांत चड तापमान ३४ अंश आनी उण्यांत उणें तापमान २४.८ अंश सेल्सियस उरलें. फुडले स दीस राज्यांत चडांत चड तापमान ३३ ते ३४ अंश आनी उण्यांत उणें २४ ते २५ अंश सेल्सियस आसतलें असो अदमास हवामान खात्यान उक्तायला.
२ ते ५ एप्रील ह्या काळांत राज्यांतलें हवामान सुकें उरपाची शक्यताय आसा. फाटल्या कांय दिसांनी राज्यांतल्या कांय वाठारांनी दमट हवामान आशिल्लें. जाल्यार सत्तरी तालुक्यांत कांय सुवातींनी वादळ वार्या सयत पावस नोंद जाल्लो.
मार्च ते मे मेरेन गोंयांत चडांत चड आनी उण्यांत उणें तापमान सरासरी परस चड आसतलें असो अदमास हवामान खात्यान केल्लो. ह्या काळांत राज्यांत सरासरी वा सरासरी परस मात्सो सकयल पावस पडटलो असो अदमास खात्यान केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
