भांगरभूंय | प्रतिनिधी
मुख्यमंत्री : 3 पाकिस्तानींक देशूय सोडपाचो आदेश
दीर्घकालीन व्हिसाचेर गोंयांत आसात 17 पाक नागरीक
भांगरभूंय । प्रतिनिधी
पणजी : गोंयांत तात्पुरत्या व्हिसाचेर 3 पाकिस्तानी नागरीक आसात. केंद्रीय गृह मंत्रालयाच्या आदेशा प्रमाण तांकां 27 एप्रील मेरेन देश सोडपाचो आदेश दिला. दीर्घकालीन व्हिसाचेर 17 पाकिस्तानी नागरीक गोंयांत आसात. हया 17 जाणांच्या हालचालींचेर पुलिसांची सुरक्षेच्या नदरेंतल्यान खर नदर आसतली. पहलगाम हल्ल्याचे फांटभुयेर गोंयांत खर सुरक्षा वेवस्था आसतली. कोम्बिग ऑपरेशना सयत नाकाबंदी सुरू जातली, अशें मुख्यमंत्री डॉ. प्रमोद सावंत हांणी सांगलें.
केंद्रीय गृहमंत्री अमीत शाह हांणी शुक्रारा सुरक्षेच्या विशयाचेर मुख्यमंत्री डॉ. प्रमोद सावंत हांचे कडेन फोनाचेर चर्चा केली. हाचे उपरांत मुख्यमंत्र्यांनी उंचेल्या पावंड्याचेर बसका घेवन गोंयांतले सुरक्षेचे स्थितीचो नियाळ घेतलो. मुखेल सचीव, पुलीस म्हासंचालक, पुलीस अधिकारी, सीआयएसएफ, नौदळ, तटरक्षक दळ, जिल्होधिकारी आनी हेर अधिकारी बसकेक हाजीर आशिल्ले.
सुरक्षे खातीर केंद्रीय गृह मंत्रालयान जी अॅडवायजरी जारी केल्या, ताची गोंयांत कार्यवाही जातली. डिप्लोमेटीक आनी सरकारी आनी दीर्घकालीन (एलटीव्ही) व्हिसा सोडल्यार हेर व्हिसाचेर आशिल्ल्या पाकिस्तानी नागरिकांक देश सोडपाचो आदेश केंद्रीय गृह मंत्रालयान दिल्यात. हे प्रमाण गोंयांत 3 पाकिस्तानी नागरीक आशिल्लाचें दिसून आयलां. तांकां 27 एप्रील मेरेन गोंय तशेंच देश सोडपाचो आदेश पावयला. दीर्घकालीन व्हिसाचेर 17 पाकिस्तानी नागरीक गोंयांत आसात. हातूंत दादले तशेच बायलांचो आस्पाव आसा. ते हिंदू, मुस्लीम वा क्रिस्तांव धर्माचे आसून गोंयकारां कडेन ते लग्न जाल्यात. तांच्या वेव्हारांचेर पुलिसांची नदर आसतली, अशें मुख्यमंत्री डॉ. प्रमोद सावंत हांणी सांगलें.
सुरक्षे खातीर गोंयांत कोम्बीग ऑपरेशन तशेंच अचकीत नाकाबंदी जातली. विमानतळां, रेल्वे स्टेशनां, पर्यटन थळां तशेंच बसस्टॅण्डांचेर खर सुरक्षा वेवस्था आसतली. सप्तकी बाजारांत येवपी विक्रेत्यांची तपासणी जातली. तांणी वळखपत्र बाळगप सक्तीचें आसा. गोंयांत 826 ट्रॉलर्स आनी 1206 व्हडीं आसात. ट्रॉलर तशेंच व्हड्यां वयल्या कामगारांचेर नदर दवरपा खातीर कामगारांक बायोमेट्रीक कार्ड दिवपाचो प्रस्ताव आसा. बिराडकारांचे तपासणी सयत, दर्या मार्गान येवपी प्रवाशांचेर नदर आसतली. समाजीक माध्यमांचेर लेगीत पुलिसांची नदर आसतली. काश्मिरांतले विद्यार्थी तशेंच वेपाऱ्यांक सुरक्षा दिवपाची सरकाराची जापसालदारी आसा. तांकां फावो ती सुरक्षा दितले. कसलोय दुबाव दिसलो जाल्यार तांणी पुलिसांक कळोवचें, असो उलो मुख्यमंत्री डॉ. प्रमोद सावंत हांणी मारला. सुरक्षेच्या उपायांक सहकार्य करपा सयत गोंयकारांनी धर्मीक एकचार राखचो, असोय उलो मुख्यमंत्र्यांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
