भांगरभूंय | प्रतिनिधी
मुख्यमंत्री : पंचायत सचिवांक दिल्यात मंजुरीचे अधिकार
भांगरभूंय । प्रतिनिधी
पणजी : कायदेशीर घरांनी रावप्यांनी पांच वर्सांची घरपटी भरिल्ली आसत तशेंच तांचे कडेन हेर कागदपत्रां आसत जाल्यार घर दुरुस्ती खातीर तांकां तीन दिसांनी पंचायत सचिवा कडल्यान घर दुरुस्ती खातीर परवाने मेळटले, अशें मुख्यमंत्री डॉ. प्रमोद सावंत हांणी स्पश्ट केलें. बुधवारा मंत्रीमंडळ बसके उपरांत ते पत्रकारां कडेन उलयताले.
रावता त्या घराचे दुरुस्तीचे परवाने मेळोवचे खातीर त्या घरांत रावप्यांक हे आदीं धडपडचें पडटालें. तांचे अर्ज पंचायत सचिवा कडल्यान गटविकास अधिकाऱ्या कडेन (बीडीओ) वताले. ते उपरांत संबंदीत घराचे दुरुस्तीचो अहवाल अभियंत्या वरवीं तयार जावन ही प्रक्रिया परतून पंचायत सचिवा कडेन येताली. तातूंत खूब दीस वताले. ते खातीर सरकारान ही प्रक्रिया सुटसुटीत केल्या. कायदेशीर घरांनी रावप्यांच्या घर दुरुस्तीच्या अर्जांक मंजुरी दिवपाचे अधिकार पंचायत सचिवांक दिल्यात, अशें मुख्यमंत्र्यान स्पश्ट केलें.
कायदेशीर घरांनी रावपी मनशांनी पांच वर्सांची घरवटी भरिल्ली आसत आनी तांचे कडेन हेर सगळीं कागदपत्रां आसत जाल्यार तांकां तीन दिसांनी घर दुरुस्ती विशींचे गरजेचे परवाने दिवप पंचायत सचिवांक बंधनकारक आसतलें, अशें मुख्यमंत्री डॉ. सावंत हांणी सांगलें.
मुख्यमंत्री डॉ. सावंत हांणी पत्रकार परिशदेंत हे विशींची म्हायती जाहीर केले उपरांत तशे तरेचें परिपत्रक पंचायत संचालक सिद्धी हळर्णकार हांणी जारी केलें. घर दुरुस्तीच्या परवान्या संबंदांत 1999 आनी 2002 त जारी केल्ल्या आदेशांत सरकारान दुरुस्ती केल्या. अर्जदारान फाटल्या पांच वर्सांची घरपटी भरिल्ली आसत तशेंच संबंदीत घर कायदेशीर तरेन नोंदणी केल्लें आसत जाल्यार ताका दुरुस्तीचो परवानो दिवपाचे अधिकार हाचे मुखार पंचायत सचिवां कडेन आसतले, अशें परिपत्रक जारी केलां. अशे तरेचे अर्ज पंचायत सचीव तीन दिसां भितर निकालांत काडटले. शुल्क भरले उपरांत घर दुरुस्ती खातीर तत्काळ परवानो दितले. पंचायत सचिवान तीन दिसां भितर निर्णय घेतलो ना जाल्यार परवानगी आपसूक मंजूर जाली अशे धरतले, अशेंय परिपत्रकांत स्पश्ट केलां. ताका लागून घर दुरुस्तीचे परवाने मेळोवचे खातीर फावटी मारप्यांक व्हड थाकाय मेळ्ळ्या. पूण हो नेम फक्त एका माळ्याच्या घराचे दुरुस्ती पुरतो लागू आसतलो.
भोवमजली वा एका परस चड घरांचे बाबतींत आदलेच नेम लागू आसतले, अशें परिपत्रकांत म्हणलां. ताका लागून अश्या घरांचे दुरुस्ती खातीरचे परवाने मेळयतना संबंदितांक आदलेच पद्दतीन प्रक्रिया करची पडटली.
‘तत्काळ परवाने मेळचे म्हूण निर्णय’
घोग्यांनी पडपी पावसाक लागून दर वर्सा गोंयांतल्या खूबश्या लोकांच्या घरांची व्हड प्रमाणांत पडझड जाता. तांकां घरांचे दुरुस्ती खातीर पंचायत सचिवां कडेन अर्ज करचो पडटा. संबंदीत अर्ज बीडीओ कडेन वचून ताची अभियंत्या वरवीं पळोवणी जाले उपरांत निर्णय घेतात. ते उपरांत संबंदितांक ते खूब वर्सां सावन रावतात त्या घराचे दुरुस्तीचे परवाने मेळटात. अश्या लोकांक तत्काळ घर दुरुस्तीचे परवाने मेळचे, हे खातीर हो निर्णय घेतला, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
