भांगरभूंय | प्रतिनिधी
नवी दिल्ली : अमेरिकेंतल्या बेकायदो भारतीय स्थलांतरितांक परत धाडपाची प्रक्रिया सोमारा सुरू जाली. ‘सी-१७’ ह्या अमेरिकन लश्कराच्या विमानांतल्यान टेक्सासांतल्या सॅन अँटोनियो हांगच्यान २०५ बेकायदो स्थलांतरितांक भारतांत परत धाडटात. पंतप्रधान नरेंद्र मोदी ह्या म्हयन्यांत अमेरिकेचो दौरो करपाचे आसात. तेन्ना ते राष्ट्राध्यक्ष डोनाल्ड ट्रम्प हांचीय भेट घेतले. अशें आसतना हे चर्चेची वाट पळयनासतनाच अमेरिकेन कारवाय सुरू केल्या.
अमेरिकेंत १.१० कोटी बेकायदो स्थलांतरीत आसात अशेंे ट्रम्प हांचें म्हणणें आसा. स्थलांतरितां आड खर पावलां उबारपाची घोशणा केले उपरांत भारतांत धाडपी हो स्थलांतरितांचो पयलो गट.हे विशीं दिल्लींतल्या अमेरिकी दूतावासां कडेन संपर्क केलो तेन्ना, तांच्या म्हणयार्यान सांगलें, बेकायदो स्थलांतरितां खातीर जोखीम आपणावपाची गरज ना. फाटल्या वर्सा अमेरिकेंतल्यान सुमार १,१०० बेकायदो स्थलांतरीतांक विशश विमानांनी भारतात परत धाडिल्ले. अमेरिकेच्या स्थलांतर विभागाचे अधिकारी सुमार २० हजार बेकायदो भारतीय स्थलांतरितांक परत धाडपाक सज्ज आसात. एका अंदाजा प्रमाण, अमेरिकेंत सुमार सात लाख २५ हजार बेकायदो भारतीय स्थलांतरीत आसात.
‘पंतप्रधान नरेंद्र मोदी हांचे वांगडा जाल्ले चर्चेंत तांणी आमकां जें योग्य आसा तें करपाक सांगलां. ते बेकायदो स्थलांतरितांक परत घेवपाक तयार आसात.’ अशें ट्रम्प हांणी ह्यान पयलींय जाहीर केल्लें. जाल्यार, परराष्ट्रमंत्री एस. जयशंकर हांणी फाटल्या म्हयन्यांत अमेरिकेचे परराष्ट्रमंत्री मार्को रुबियो हांची भेट घेतिल्ली. तेन्ना आमी बेकायदो स्थलांतरितांची पळोवणी करून तांकां परत घेवपाक तयार आशिल्ल्याचें स्पश्ट केल्लें. आमचो खंयचोय नागरीक अमेरिकेंत बेकायदो रावता अशें कळ्ळ्यार आनी आमी ताच्या नागरिकत्वाची तपासणी केल्यार आमी तांकां कायदेशीरपणान भारतांत धाडटले, अशें जयशंकर हांणी फाटल्या म्हयन्यांत स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
