तीन टप्प्यांतलें नवें शिक्षणीक वर्स

भांगरभूंय | प्रतिनिधी

आतां जूनाचें पयलें सप्तक धांवपळीचें, नव्या पावसांत उत्साहान भिजत शाळेंत वचपाचें उरिल्लें ना. जाल्यार फाटल्या वर्सांत जें करीत रावले तेंच मुखार व्हरपाचें आसा.

राष्ट्रीय पांवड्या वेल्या नवें शिक्षणीक धोरण सगल्यांत पयलीं चालीक लावपी वा अंमलबजावणी करपी पयलें राज्य म्हूण गोंया खातीर नेमको कसलो पुरस्कार फुडारांत मेळटलो वा ताचे पसून कसले लाव अपेक्षीत आसात हें कळपाक मार्ग ना. खंयच्या अधिकाऱ्याच्या कुशिल्ल्या मेंदवांतल्यान नवें धोरण अंमलबजावणी खातीर एक एप्रील सावन नवें शिक्षणीक वर्स सुरू करपाची कल्पना भायर आयली आनी ताचेर फाटलो फुडलो कसलोच विचार करिनासतना सरकारानूय तसो निर्णय घेवन पयलीं सावन चलत आयिल्ल्या नव्या शिक्षणीक वर्साची व्याख्याच बदलून उडयली. नवी कल्पना वा प्रस्तावाचेर खूब विचारविनिमय जाल्ल्याचें आनी तातूंतल्यान तीन टप्प्यांतलें नव्या शिक्षणीक वर्साचो प्रस्ताव कार्यवाहीत हाडपाचो निर्णय जाल्ल्याचें व्हड नेटान सांगत आसले तरी तीन टप्प्यांतल्या नव्या शिक्षणीक वर्सांत सगल्याच मळार आयज जो विरोध दिसून येता तो दिसूंकच नाशिल्लो. नव्या धोरणा प्रमाण काल सात एप्रील दिसा नव्या शिक्षणीक वर्सांतलो वीस-एकवीस दिसांचो पयलो टप्पो सुरू जालो तेन्ना खूबशा पालकांक शाळांनी नवें वर्स सुरू जायत आसा काय पोरण्या वर्साचें हें एक्स्टेंशन आसा हेंच कळ्ळें ना. नव्या शिक्षणीक वर्साची ती ताकतीक, पालकांची ही म्हूण गर्दी, आपलो नवो वर्ग सोदपा खातीर गोंदळून गेल्ले विद्यार्थी आनी पालक, नवो युनिफॉर्म, नवीं दप्तरां हें सगलेंच चित्र शिक्षणीक वर्साच्या पयल्या दिसा जें अपेक्षीत आसता तें काल पयल्या दिसा खंयच दिसून आयलें ना. ताका लागून नव्या शिक्षणीक वर्साची व्याख्याच बदलून उडोवपी हें नवें शिक्षणीक वर्स थारचें अशें म्हणत जाल्यार तें अतिशयोक्तीपूर्ण थारुये.

विद्यार्थ्यांच्या बऱ्या फुडाराचो विचार करूनच नव्या राष्ट्रीय शिक्षणीक धोरणाक न्याय दिवपा खातीर हो निर्णय घेतला (वा लादला) असो दावो शिक्षण खातें करता. पूण हातूंतल्यान लेगीत बरो मार्ग काडूंक मेळटलो आशिल्लो काय कितें हो सादो सोंपो प्रस्न आसा. निश्चीतपणान पालक-विद्यार्थी आनी शिक्षकांकूय लेगीत हे प्रक्रियेंत वांटेकार करून हो निर्णय घेतिल्लो जाल्यार नव्या शिक्षणीक वर्साचे सुरवेक म्हणल्यार पयल्याच दिसा राज्यांत सगले कडेन एक तरेची मरगळ दिसून आयली ती दिसची नाशिल्ली. शिक्षण खातें आनी संबंदीत अधिकारी आपणे घेतिल्लो निर्णय चालीक लायिल्ल्यान ते नक्कीच खूश आसतले, पूण जांच्या सहभागांतल्यानूच नवें शिक्षणीक धोरण येसस्वी जावप अपेक्षीत आसा ते तीन घटक म्हणल्यार विद्यार्थी, शिक्षक आनी पालक हेच जर ताचेर नाखूश आसत जाल्यार ताचो उपेग कितें हाचोय विचार करचो पडटलो. पोरणें शिक्षणीक वर्स सोंपले उपरांत विद्यार्थी, शिक्षक आनी पालकांकूय म्हयनो-देड म्हयनो मानसीक थकव्यांतल्यान जो ब्रेक मेळटलो तो वर्सभर अदीक नेटान काम करपा खातीर, विद्यार्थ्यां कडल्यान आनीक कितें तरी करून घेवपा खातीर पालक-शिक्षक हांकां तरतरी हाडपी आशिल्लो. पालक-शिक्षकांक कसलो येता मानसीक थकवो असोय प्रस्न घडये शिक्षणाधिकारी करतले, पूण पालकच आयच्या शिक्षण वेवस्थेंत पुरायपणान वर्सभर पुराय थकिल्लो आसता हें कोणाक सांगपाची गरज आसा अशें दिसना.

नव्या शिक्षणीक धोरणा खाला घेतिल्ल्या चुकीच्या निर्णयाक हें सगलें आतां इतिहासजमा जालां. विद्यार्थी-पालक आनी शिक्षकांनीय आतां जाणून घेवंक जाय की जून हो नव्या शिक्षणीक वर्साची सुरवात करपी म्हयनो उरिल्लो ना. आतां जूनाचें पयलें सप्तक धांवपळीचें, नव्या पावसांत उत्साहान भिजत शाळेंत वचपाचें उरिल्लें ना. जाल्यार फाटल्या वर्सांत जें करीत रावले तेंच मुखार व्हरपाचें आसा. आतां दिवाळीच्या आनी नातालाच्या दीर्घ सुटयां बरोबरच आनीक एक 30-32 दिसांची दीर्घ सुटी विद्यार्थ्यांक मेळटली, आनी हाका शिक्षणीक वर्साच्या कॅलेंण्डरांत पयली सुटी म्हणूनच नोंद जातली. एक एप्रील सावन नवें शिक्षणीक वर्स सुरू करपाचो जाल्लो यत्न अपेशी थारलो आनी ते खातीर सात एप्रीलाचो नवो म्हूर्त अंदूं काडचो पडलो हाका लागून शिक्षण वेवस्थेंतल्या तिनूय मुखेल घटकांक मात्शी थाकाय मेळ्ळी इतलेंच. नव्या शिक्षणीक वर्साच्या पयल्या दिसा एक दोन विद्यालयांत सहज म्हूण गेल्लों तेन्ना जे पालक मेळ्ळे तातूंतल्या चडशा जाणांनी एकूण शिक्षण वेवस्थेचेर जें तोंडसूख घेतलें ताचो गंभीरपणान विचार करीत जाल्यार जें कितें चल्लां तें बरोबर आसा अशें म्हणपाचें धाडस करूंक येवचें ना. सोंपिल्ल्या शिक्षणीक वर्सांतल्या आपल्यो जापसालदारक्यो पुर्णत्वा कडेन गेल्ल्यो नासतना शिक्षक- शाळा वेवस्थापन नव्या वर्सांतल्यो जापसालदारक्यो आपल्या आंगार कशे घेवंक शकतात आनी ताका ते न्याय कशे दिवंक शकतात होच खूबशा जाणांचो प्रस्न आशिल्लो आनी ताका कोणे तरी जाप दिवपाची खरी गरज आसा.

सवे सावन आठवी मेरेनच्या विद्यार्थ्यांच्या परिक्षांचे निकाल लागिल्ले नात. तांची पेपर तपासणी, निकाल तयार करप हातूंत शिक्षक गुथिल्लो आसतनाच नवे वर्ग सांबाळपाची जापसालदारकी तांचेर येवन पडल्या. अशे परिस्थितींत हे शिक्षक विद्यार्थ्यांक कितें दितले हाचो विचार करीत जाल्यार फक्त हजेरीचे तास दाखोवपा खातिरूच हो सगलो खटाटोप बी केला नासुये मूं? अशेंय म्हणूंक येतलें. नव्या शिक्षणीक धोरणाचे फाटभुंयेर शालेय अभ्यासक्रम पुराय करपा खातीर वेळ उणो पडत आशिल्ल्यान शिक्षणीक वर्साचो कालावधी बदलिल्ल्याचें शिक्षण खात्या कडल्यान सांगतात. हो दावो मान्य केलो तरी ह्या रखरखत्या गिमांत पंदरा-वीस दीस अर्दवेळ शाळा घेवन कितें साद्य जातलें हाची जाप मेळना. आतां नवें शिक्षणीक वर्स सुरू जालांच. मे म्हयन्याची अंदूंच्या कॅलेंण्डरांतली पयली सुटी सुरू जाय मेरेन शिक्षण खातें नेमकें कितें साद्य करूंक पळयतां हें रोखडेंच कळटलें. शाळा एप्रील सावन रखरखत्या गिमांत सुरू करपाच्या सरकारी निर्णया आड काल पयल्याच दिसा पालकांनी निदर्शनां करून लक्ष ओडिल्लें हें खरें आसलें तरी आतां तातूंत कितेंय बदल जावपाची शक्यताय ना. विद्यार्थ्यांच्या फुडाराचो विचार करुनच हो निर्णय जाल्लो आसलो तरी तो फक्त कागदारूच उरनासतना ताची परिणामकारक रितीन अंमलबजावणी जावची हे खातीर खरतायेन यत्न करचे पडटले. विद्यार्थी, पालक आनी शिक्षकूय आयज हो निर्णय मना सावन स्विकारपाचे स्थितींत नात. फक्त औपचारिकता पुराय करपा खातीर हो निर्णय आशिल्ल्याचो जो तांचो समज जाला तो पयस करपाचें काम पयलीं शिक्षण खात्याक करचें पडटलें.

वामन प्रभू