भांगरभूंय | प्रतिनिधी
सुभाष शिरोडकार ः श्री साखळ्या गणेशोत्सव मंडळाचो इनामां वांटप सुवाळो
मडगांव: बोरयेचे श्री नवदुर्गा तळयेची दुरुस्ती आनी सोबितीकरणाचेर तीन कोटी खर्च करतले. ताची निविदा प्रक्रिया सुरू जाल्या. हे सैमीक तळयेचें संवर्धन करपाचो यत्न करतले अशें उदका स्रोत आनी सहकार मंत्री सुभाष शिरोडकार हांणी सांगलें.
बोरये खाणीर हांगाच्या श्री साखळ्या सार्वजनिक गणेशोत्सव मंडळाच्या इनामां वांटप आनी सत्कार सुवाळ्यांत ते मुखेल सोयरे ह्या नात्यान उलयताले. ह्या वेळार माचयेर अध्यक्षा शुभदा खोलकार, संस्थापक विनायक कोठंबीकार, श्यामराव नायक, शशी पाचन, उपसरपंच किरण नायक, पंच जयेश नायक, पंच विनय बोरकार, पुरस्कर्ते कश्यप आनी शैलेश बोरकर हाजीर आसले.
प्रास्तावीक सचीव दिनेश केंकरे हांणी केलें आनी तांणीच येवकार दिलो. ह्या वेळार उद्देजक शशी पाचन आनी पत्रकार शैलेश बोरकार हांचो आयोजनांत योगदान दिल्ले खातीर मंडळाचे वतीन श्रीफळ, शाल, गुलाबाचें फूल आनी स्मरणचिन्न भेटोवन मंत्री सुभाष शिरोडकार हांचे हस्तुकीं भोवमान केलो.
भोवमानाक जाप दितना शैलेश बोरकार हांणी मंडळाचे वतीन समाजाक उपेगी आनी प्रबोधनाच्यो कार्यावळी आयोजीत करपाचो यत्न करतले म्हणपाचें सांगलें.
ह्या वेळार पंच जयेश नायक हांणी श्री साखळ्या सार्वजनिक गणेशोत्सव मंडळाचे समितीचें अभिनंदन करून फुडल्या कामाक शुभेच्छा दिल्यो. मंडळाचे वतीन घेतिल्ल्या विंगडविंगड सर्तीनी जैतिवंत जाल्ल्यांक मुखेल सोयऱ्यांचे हस्तुकीं इनामां भेटयलीं.
सल्लागार समितीचे सुरज अवती हांणी उपकार मानले. उपरांत स्टार यार कलाकार आॅकेस्ट्रा जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
