तीन कडेन ‘हीट अ‍ॅण्ड रन’

भांगरभूंय | प्रतिनिधी

एकल्याक मरण, तीग जखमी, पुलीस गाडी जप्त

भांगरभूंय । प्रतिनिधी

मडगांव/म्हापशें : सोमारा कुंकळ्ळे, म्हापश्यां – गिरी ग्रीन पार्क आनी धुळेरांत गाडयेचो धपको दिवन पळून वचपाच्यो घडणुको घडल्यो.

कुंकळ्ळे सकाळच्या आदेसाक एका अनवळखी गाडयेन चलत वचपी एका मनशाक  धपको दिवन घडणुके सुवाते वयल्यान पळ काडलो. ह्या अपघातांत जखमी संतोष नायक (33, रा. पायराबांध, कुंकळ्ळें) हाका जाग्यारूच मरण आयलें. हे विशीं कुंकळ्ळेंचे पुलीस तपास करतात.

हे विशीं चड म्हायती प्रमाण, सोमारा सकाळीं एके अनवळखी गाडयेन संतोष नायक हाका धपको दिलो. ते मॉर्नींग वॉका खातीर घरांतल्यान भायर सरिल्ले. रस्त्या वयल्यान चलतना अचकीत फाटल्यांतल्यान येवपी गाडयेन तांकां धपको दिलो. संतोष हे जखमी अवस्थेंत पडून आशिल्ले. हातूंतच तांकां मरण आयलें.

लोकांनी पुलिसांक हे विशीं म्हायती दिले उपरांत तांणी येवन पंचनामो केलो. पुलीस ह्या मार्गा वयल्यो सीसीटीव्ही फुटेज पळोवन गाडयेचो सोद घेतात.

हो रस्तो अशीर आशिल्ल्यान ह्या वाठारांत परतून परतून अपघाताच्यो घडणुको घडटात. थंय बायपास बांदचो अशी मागणी थळाव्या लोकांनी केली.

धुळेर म्हापश्यां आनी ग्रीन पार्क गिरी वाठारांत जाल्ल्या ‘हीट अ‍ॅण्ड रन’ अपघातांत एका ल्हान भुरग्या सयत तीग दुचाकी चालक जखमी जाले. ह्या अपघाताक कारण थारिल्लो पुलीस जीप चालक आनी अज्ञात म्हाल व्हरपी रिक्षा चालका आड म्हापशें पुलिसांनी गुन्यांव नोंद केला.

अपघातांत किर्ती कामत (28. रा. आकय) तशेंच तिचो पूत स्पर्श कामत (4) आनी संतोष कासकार (73. रा. गिरी) हे जखमी जाल्यात. तांचेर म्हापशें जिल्हो हॉस्पिटलांत मुळावे उपचार केले.

सोमारा दनपारां 12.10 वरांच्या सुमाराक धुळेरांतल्या कपेला मुखार पुलीस जिपीचो इलेक्ट्रीक दुचाकीक (जीए 03 एजी 4375) धपको बसलो. ह्या अपघाता उपरांत पुलीस जीप चालक संदीप नायक घडणुकेचे सुवाते वयल्यान गाडी घेवन पळून गेलो. हो अपघात लागींच आशिल्ल्या एका आस्थापनाचे सीसीटीव्हींत कैद जालो. पुलिसांनी सीसीटीव्ही फुटेजीच्या आदारान पुलीस एस्कॉर्टची जीप कोलवाळ बंदखणींतल्यान जप्त केली.

मजगतीं, सांजेच्या 4.45 वरांच्या सुमाराक गिरीच्या ग्रीन पार्क जंक्शनाचेर एका अज्ञात म्हाल व्हरपी रिक्षेन दुचाकीक (जीए 03 एस 3991) धपको मारलो. ते उपरांत दुबावीत रिक्षा चालक थंयच्यान रिक्षा घेवन धोफरायत गेलो. पुलीस दुबावीत रिक्षा चालकाक सोदतात. ह्या अपघातांत दुचाकी चालक संतोष कासकार जखमी जाले. अपघाताचो पंचनामो म्हापशें पुलीस हवालदार केशव नायक हांणी केलो. फुडलो तपास पुलीस करतात.