भांगरभूंय | प्रतिनिधी
पणजीः गोंयांत 75 मार्गांचेर कंदबच्यो 141 इलेक्ट्रीक बशी धावतांत. तातूंतल्या तीन अंतरराज्य मार्गार ह्यो ईव्ही बशी धावतांत. एका मार्गार ईव्ही बस मडगांवच्यान सुटून सावंतवाडी मेरेन प्रवास करता आनी परतून येता, अशी म्हायती येरादीर मंत्री माॅवीन गुदिन्हो हांणी लेखी जापेंत दिल्या.
मडगांवचे आमदार दिगंबर कामत हांणी विधानसभेच्या पटलार मांडिल्ल्या प्रस्नाक येरादीर मंत्री माॅवीन गुदिन्हो हांणी जाप दिल्या.
सद्या 75 मार्गार धांवपी ईव्ही बशी मदले 13 मार्ग पणजी स्मार्ट सिटीचे आसात जाल्यार उरिल्ले हेर 63 मार्ग हे गोंया भितरले आनी गोंया भायले मार्ग आसात. हातूंत तीन अंतरराज्य मार्गांचो आस्पाव आसा. एक मार्ग कर्नाटकाक वता जाल्यार दोन मार्ग महाराष्ट्रांत वतात.
सगल्यांत चड पयसुल्लो ईव्ही बस प्रवास करपी मडगांव ते सावंतवडी हो अंतरराज्य मार्ग आसा. ह्या मार्गा वेली बस मडगांव सावन सुट्टा उपरांत पणजी, पत्रादेवी थांबो घेवन ती सावंतवाडी वचून परतून मडगांवां येता. जाल्यार दुसऱ्या अंतरराज्य मार्गार पणजी ते बांदा ईव्ही बस धांवता. पणजे ही बस सुटून पेडणें आनी मडुरा हांगा थांबो घेता आनी बांदा वचून परतून पणजे येता.
फक्त कर्नाटकांत कारवार मेरेन ईव्ही बस धावता. ह्या मार्गार ईव्ही बस मडगांव सावन सुट्टा, काणकोण थांबो घेवन कारवार पावता आनी उपरांत परतून मडगांवां येता.
141 ईव्ही बशी मदल्यो 48 स्मार्ट सिटीच्यो पीएमआय कंपनीच्या बशींचो जाल्यार 93 ओलेक्ट्रा ह्या कंपनीच्या बशींचो आस्पाव आसा.
ओलेक्ट्रा कंपनीच्यो 9 मिटर लांबायच्यो 43 बसी आसात. तातूंतले एक बसीचो अपघात जावन दुरुस्तीचें काम चालू आसा. जाल्यार ओलेक्ट्रा कंपनीच्यो 12 मिटर लांबायेच्यो 50 बसी आसात. तातूंतले एका बशीचें देखरेखी खातीर दुरुस्ती काम चालू आसा. रोखडेंच दुरुस्ती काम पुराय जातलें. स्मार्ट सिटीतल्या पीएमआय बसींचो कसलोच विशय ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
