भांगरभूंय | प्रतिनिधी
भांगरभूंय । प्रतिनिधी
पोरणे गोंयः कुडका, आझोशीं, चिंबल तशेंच आपल्या सान्तआंद्रें मतदारसंघांतल्या बांदकाम प्रकल्पां विशी म्हायती दिनात ताचो निशेध करपा खातीर आमदार विरेश बोरकार हाणे आपल्या पक्ष वावुरप्यां सयत तिसवाडीच्या उप नगर निजोयकाच्या पणजेच्या कार्यालयांत शुक्राराक धरणे धरलें. आपल्याक जाय ती म्हायती मेळसर ऑफिसांतल्यान वच्चो ना असो पवित्रो ताणे घेतिल्लो.
म्हज्या मतदारसंघांत्ल्या बांदकाम प्रकल्पां विशीं म्हाका जी म्हायती जाय ती नगर नियोजक दिनात जाल्यार हांव आमदार आसून कितें फायदो अशें ताणे सांगलें. फाटल्या 20 वर्सांत मतदारसंघात मान्यताय दिल्ल्या प्रकल्पां विशीं हांवें म्हायती दिवपाक सांगलें तेन्ना म्हाका म्हायती हक्क कायद्या खाला ती मागपाक सांगली. आमदारान म्हायती हक्क कायद्या खाला अर्ज करपाचो काय किंदें, अशे विचारून ज्या प्रकल्पांक मान्यताय दिल्या तातूंत व्हडलो घोटाळे केल्ल्यान आपल्याक जाय ती म्हायती दिनात असो आरोप बोरकारान केला.
आझोशींतल्या एका प्रकल्पाचें काम बंद करपाक सांगल्लें. निगर निजोजन खात्यान आपल्याक वा पंचायत मंडळाक कळयनास्तना काम बंद करपाचा आदेश फाटीं घेतला. हाचो अर्थ नगर नियोजन खातें आपल्याक जाय तें करपाक मेकळें आसा काय कितें. म्हज्या मतदारसंघातल्या लोकांची हितराखण करप ही म्हजी लागणूक आसा. उपनगर नियोजक आपल्याचेर वयल्यान चेंपण येतां अशें सांगता. हाचे वयल्यान ह्या खात्यांत भ्रश्टाचार चलता असें बोरकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
