तिसऱ्या म्हाझुजाची नांदी?

भांगरभूंय | प्रतिनिधी

अमेरिकेन पयर मध्यानरातीं व्हेनेझुएलाचेर अचकीत हल्लो करून पुराय संवसाराक धपको दिलो. कांय जाणकारांच्या मतान, ही तिसऱ्या म्हाझुजाची नांदी. अजून बरेंच कितें जावपाचें आसा. भटमाम निकतोच न्हावंक गेला! रशिया, चीन, इराणान उक्तेपणान अमेरिकेचे दादागिरीचो खर निशेध केला. भारत आनी कांय इस्लामी देशांनी हुस्को उक्तायला. भासाभास करून हो तणाव सोडोवचो अशें आवाहनूय केलां. मात, ट्रम्प हांचो इतिहास पळयल्यार ते कोणाचें आयकत अशें दिसना. व्हेनेझुएला घुंवळे वखदां अमेरिकेंत हाडटा आनी हे तस्करीचो अमेरिकनांक धोको आसा, आमची सुरक्षाय धोक्यांत येवं शकता, अशीं कारणां दिल्यांत, तरी थंयचें तेल आनी हेर साधनसुविधा हातासप, हें हल्ल्यां फाटलें मुखेल कारण आशिल्ल्याचें जाणवता. सध्या व्हेनेझुएलाचे अध्यक्ष निकोलस मादुरो आनी तांची घरकान्न अमेरिकेच्या ताब्यांत आसात. तांकां न्यायालया सामकार उबीं केल्लीं. व्हेनेझुएलाचें प्रशासन आतां कांय काळ अमेरिका चलयतली. सरकार पक्षाच्या विरोधकांक, खास करून स्थलांतरीतांक जालें तें बरेंच जालें, अशें दिसता. मात हे एकूणच घडणुकेक लागून राजकी दावपेच, कुटनितीक वेग आयला. संवसारभर अस्वस्थताय वाडल्या.
व्हेनेझुएला हो दक्षीण अमेरिकेंतलो देश. कोलंबिया, ब्राझिल आनी गुयाना हे ताचे शेजारी. लोकसंख्या सादारण 3 कोटी. भाशा स्पेनिश. संवसारांतलो सगल्यांत व्हडलो अँजिल्स घसघसो हांगा आसा. रासायनीक शस्त्रां आसात म्हूण अमेरिकेन कांय वर्सां पयलीं इराकाचेर हल्लो केल्लो. कांयच मेळूंक ना. लोक मात विस्थापीत जाल्ले. अध्यक्ष सद्दाम हुसेनाक गोळार दिल्लो. आपलीं शस्त्रांस्त्रां खपोवपाक, साधन- सुविधांचेर हात मारपाक अमेरिका हल्लो करता, अशें बऱ्याच जाणकारांक दिसता. मात, डोनाल्ड ट्रम्प सत्तेर येत सावन अमेरिकेन अशे बरेच निर्णय घेतल्यात जे भारता सयत खुबश्या देशांक मारक थारल्यात. भारतान पाकिस्तानाचेर केल्लो हवाई हल्लो आपणे थांबयलो, अशें ट्रम्प हांणी बरेच खेपे सांगलां. युक्रेन- रशिया झूज मात तांकां बंद करूंक जमलें ना. आतां हो हल्लो व्हेनेझुएलाच्या सामान्य लोकांक फायद्याचो थारता काय आखातांतल्या कांय देशां प्रमाण बादक थारता, तें रोखडेंच कळटलें.
व्हेनेझुएलांतली सत्ता बदलपाकूच हो हल्लो केला, असो राजकी विश्लेशकांचो दावो. तेल, जमनीचेर नियंत्रण आनी लॅटीन अमेरिकेंतलें आपलें बळगें वाडोवप, होय अमेरिकेचो गुपीत हेतू आसा. तेल आनी बाजारपेठेचेर नियंत्रण मेळोवपाक दोनूय देशां मदीं फाटलीं 10- 12 वर्सां संघर्श चलता. चडसो गुपितपणान. हो हल्लो हें ताचेंच फळ. आंतरराष्ट्रीय कायद्या प्रमाण अशी कोणाचेरूय अनधिकृत सैनिक कारवाय करपाक मेळना. संयुक्त राष्ट्रांचे सुरक्षा परिशदेची ह्या हल्ल्याक मान्यताय ना. म्हणटकच हें आक्रमण जालें. मादुरोच्या बेडरुमांत घुसून मध्यानरातीं ताका अटक करप हो अवैध प्रकार. फक्त स्वताचे भुंयेचे राखणे खातीर वा सुरक्षा परिशदेची मान्यताय आसल्यारूच हल्लो करूंक मेळटा. चीन, रशिया ह्यो म्हासत्ता अमेरिकेक किंकोत करतात. तांणी अमेरिकेचेर टिका केल्या. इराण उलयला. लॅटिन अमेरिकेंतले हेर देशूय अस्वस्थ आसात. तांची प्रतिक्रिया कितें ती ह्या सप्तकांतूच कळटली. युनोचे म्हासचीव हुस्को आंतोनियो गुटारेस हे शांतताय राखात म्हणटात. तशी अमेरिका युनोचें आयकना हें हाचे पयलीं सिद्ध जालां. आतां ट्रम्प मेक्सिकोचीय कळ काडपाक शकता.
व्हेनेझुएलाच्या नागरिकांनी (सरकार समर्थक) राष्ट्राध्यक्षाचें अवैध अपहरण, आक्रमण, अमेरिकेन आमच्या देशाची सत्ता बळकायली, अश्यो प्रतिक्रिया दिल्यात. विरोधक म्हणटात, देशांत नवी फांतोड फुलतली. ती फुलता तेन्ना फुलता, पूण अमेरिकेन इराक, अफगाणिस्तान समजून सध्या जें पावल उखल्लां, ताणें व्हेनेझुएलांत तणाव निर्माण जाला, हवाई हल्ल्यांक लागून देडश्यां वयर लोकांक मरण आयलां. अर्थीक संकश्ट दारार उबें रावलां, ताचें कितें? व्हेनेझुएलाचो इराक जावचो न्हय!