भांगरभूंय | प्रतिनिधी
पणजी : नव्या जिल्ह्याचें मुख्यालय खंय जावचें हाचे वयल्यान केपेंचे आमदार एल्टन डिकॉस्टा आनी कुडचडेंचे आमदार निलेश काब्राल हांचे मदीं पेटलें. हें केस्तांव बंद करपा खातीर महसूल मंत्री बाबूश मोन्सेरात हांणी मध्यस्ती करून अजून हे विशीं कसलोच निर्णय जावंक ना अशें स्पश्ट केलें.
तिसऱ्या जिल्ह्याचें मुख्यालय केप्यां काय कुडचड्यार येतलें, असो प्रस्न शुन्य वरा वेळार केपेंचे आमदार एल्टन डिकॉस्टा हांणी उपस्थीत केलो. हाचेर हे विशीं कसलोच निर्णय जावंक ना, अशी जाप महसूल मंत्री बाबूश मोन्सेरात हांणी दिली. पूण एल्टन हांणी जाप मान्य करूंक ना आनी बोवाळ घालपाक सुरवात केली. जर हे विशीं निर्णय जावंक ना जाल्यार कुडचडेंचो आमदार निलेश काब्राल खंयच्या आदाराचेर मुख्यालय कुडचड्यार येता म्हूण सांगता. तिसऱ्या जिल्ह्याचें मुख्यालय कुडचडें म्हूण वेंचलें, हे खातीर आपूण सरकाराचें देव बरें करूं म्हणटां, अशें विधान काब्राल हांणी केलां.
हाचेर आक्षेप घेतना काब्राल हांणी सांगलें, तांणी अशें विधान करूंक ना. तिसरो जिल्ह्या विशीं आपूण सरकाराचें देव बरें करूं म्हणटां आनी ताचें मुख्यालय म्हूण कुडचड्याची निवड करची, अशें आपणे सरकारा कडेन मागलां, अशें काब्राल हांणी सांगलें.
ह्या विशयाचेर दोगां मदीं बरेंच पेटलें. उपरांत महसूल मंत्री बाबूश मोन्सेरात हांणी मध्यस्ती करून सांगलें, जिल्ह्याचो प्रस्ताव सुरवातीच्या पांवड्यार आसा. देखून मुख्यालय खंय व्हरप हे विशीं अजून निर्णय जावंक ना. देखून आमदारांनी झगडपाचें बंद करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
