भांगरभूंय | प्रतिनिधी
काणकोण, केपें, सांगें, धारबांदोडें म्हालांचो आस्पाव
भांगरभूंय । प्रतिनिधी
पणजी : गोंयांत आतां तिसरो जिल्हो जातलो. मंत्रीमंडळान शुक्रारा नव्या जिल्ह्याचो प्रस्ताव मंजूर केलो. काणकोण, केपें, सांगें आनी धारबांदोडें ह्या चार म्हालांचो नव्या जिल्ह्यांत आस्पाव आसतलो. नव्या जिल्ह्याचें मुख्यालय कुडचडें- केंप्यां आसतलें.
गोंयांत सध्या उत्तर गोंय आनी दक्षीण गोंय अशे दोन जिल्हे आसात. नव्या प्रस्तावा प्रमाण उत्तर गोंय जिल्ह्यांत तिसवाडी, पेडणें, बार्देस, दिवचल आनी सत्तरी हे पांच म्हाल आसतले. दक्षीण गोंयांत मुरगांव, साश्ट आनी फोंडें म्हालांचो आस्पाव आसतलो. तिसऱ्या जिल्ह्यांत दुर्गम अशे चार म्हाल आसतले. ह्या जिल्ह्या खातीर मुख्य सचिवाचे अध्यक्षते खाला समिती स्थापन करून अहवाल मागयला.
तिसऱ्या जिल्ह्याचे स्थापनेचो निर्णय प्रसासनीक सोयी खातीर तशेंच लोकांक अदीक गतीन आनी प्रभावी सेवा दिवचे खातीर घेतला. चड करून दक्षीण गोंयच्या दुर्गम वाठारांतल्या लोकांक जिल्हो मुख्यालया मेरेन पावपाक खूबश्या अडचणींक फुडो करचो पडटालो. ताका लागून केप्यां नवें जिल्हो मुख्यालय सुरू केलें जाल्यार लोकांक सरकारी कामां खातीर सहज सुविधा मेळटल्यो, असो सरकाराचो दावो आसा. नव्या जिल्ह्यांत जिल्हो हॉस्पिटल, शिक्षणीक संस्था, खेळां संकूल आनी ग्रंथालय आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
