भांगरभूंय | प्रतिनिधी
धारबांदोड्यां, सांगें, केपें आनी काणकोणचो आसपाव : केप्यां मुख्यालय
पणजी : राज्यांत तिसरो जिल्हो स्थापन करपाचेर सर्वपक्षीय आमदारांचे बसकेंत निर्णय जाल्ल्यान हे विशींची अधिसुचोवणी बेगीनूच जारी करतले. धारबांदोड्यां, सांगें, केपें आनी काणकोणा हे चार म्हाल तिसर्या जिल्ह्यांत आसतले. मुख्यालय केप्यां आसतलें, अशी म्हायती मुख्यमंत्री डॉ. प्रमोद सावंत हांणी बसके उपरांत दिली.
तिसर्या जिल्ह्याक अटल हें नांव दितले, अशें मुख्यमंत्र्यान म्हणलें. तिसर्या जिल्ह्याक काँग्रेसीचो विरोध जरी नासलो तरी ते विशीं अभ्यास जावप गरजेचें. तिसर्या जिल्ह्याच्या अभ्यासा खातीर सरकारान समिती स्थापन केल्ली. हे समितीचो अहवाल सरकारान उक्तो करप गरजेचें. अहवाल उक्तो करिनासतना ताकतिकेन तिसरो जिल्लो करप अयोग्य आसा, अशें विरोधी पक्ष फुडारी युरी आलेमाव हांणी बसके उपरांत सांगलें. आरजीचे आमदार विरेश बोरकार हांणीय लोकांक विस्वासांत घेवप गरजेचें आशिल्ल्याचें सांगलें.
तिसर्या जिल्ह्याचे स्थापने विशीं मंत्रिमंडळ तशेंच विधानसभेंत चर्चा जाल्या. निती आयोगाचे शिफारसी प्रमाण देशांत ल्हान जिल्हे स्थापन करतात. देशांत १२० नवे जिल्हे स्थापन जाल्यात. गोंयांत तिसरो जिल्हो जाला तो ताकाच लागून. तिसर्या जिल्ह्याक लागून आनीक निधी मेळपा खातीर केंद्रीय येवजण्यांचो अदीक प्रमाणांत लाव घेवप गरजेचें, अशें डॉ. सावंत हांणी म्हणलें.
धारबांदोडा, केपें, काणकोणा आनी सांगें ह्या म्हालांचो तिसरो जिल्हो करपाक सगल्या आमदारांनी फाटबळ दिलां. तिसरो जिल्हो ह्या सगल्या म्हालांक आनी लोकांक खूब फायद्याचो थारतलो. -रमेश तवडकर, कला आनी संस्कृती मंत्री आनी काणकोण आमदार
तिसर्या जिल्ह्यांत सांवड्डें, धारबांदोड्यां, केपें, कुडचडें, काणकोण आनी सांगें ह्या मतदारसंघांचाी आसपाव जातलो. ह्या मतदारसंघांतल्या लोकांक हाचो लाव जातलो. – गणेश गांवकार, सभापती आनी सांवड्डें आमदार
तिसर्या जिल्ह्याक विरोध जरी नासलो तरी ते विशीं अभ्यास जावपाक जाय. – विरेश बोरकार, आमदार, आरजी
तिसर्या जिल्ह्याक मात्तूय विरोध ना. पूण हाचो पयलीं अभ्यास जावपाक जाय. स्थापन केल्ले समितीचो अहवाल उक्तो जावचे पयलींच निर्णय घेवप सारकें न्हय. – युरी आलेमाव, विरोधी पक्ष फुडारी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
