तिसरो दीस पंत, गील आनी आश्विनाच्या नांवार

भांगरभूंय | प्रतिनिधी

विकेटकीपर बॅट्समन ऋषभ पंतान भावूक सवो टॅस्ट शेंकडो मारलो, शुभमन गिलान शांत पांचवो शेंकडो नोंदयलो आनी उपरांत भारताच्या बॉलरकांनी आनी फिल्डरांनी जबरदस्त प्रदर्शन करून चेन्नय टॅस्टीच्या तिसऱ्या दिसा बांगलादेशाच्या दुसऱ्या डावांत चार विकेटी घेतल्यो.

515 धांवड्यांचो फाटलाव करपी बांगलादेशान 4 विकेटी व्हगडावन 158 धांवड्यो केल्यात, अशे तरेन ताका अजून 357 धांवड्यांची गरज आसा आनी टॅस्टीचे दोन दीस बाकी आसात.

पंत आनी गिल हांणी आक्रमक बॅटींग केली. बऱ्या बॉलांचो सन्मान करताले आनी बाबत बॉलांचेर सके आनी चवके मारताले. गिलान मेहदी हसन मिराजाची बॉलींग फोडून काडली. जाल्यार पंतान शाकीब अल हसनाक घाम काडलो.

पयल्या अर्दांत सहज बाद जावपी पंतान दुसऱ्या डावांत योग्य बॉलांची वाट पळयली. भारत शक्य बेगीन डाव घोशीत करपाक शकता हाका लागून पंत आनी गिल हांणी जेवणाच्या विसवा पयलीं जलद रितीन धांवड्यो केल्यो. जेवणाच्या विसवाक कांय मिनटां बाकी आसतना पंत चुकीचो शॉर्ट खेळ्ळो पूण, नाजमूल हुसैन शांतोन ताची कॅच सोडली.

जेवणाच्या विसवा उपरांत पंतान 118 बॉलांनी आपलो शेंकडो पुर्ण केलो. गिलान 161 बॉलांनी शेंकडो नोंदयलो. पंत अखेरेक 109 बॉलांनी 128 धांवड्यो करून बाद जालो. ताचे उपरांत आयिल्ल्यान लोकेश राहुलान 19 बॉलांनी नाबाद 22 धांवड्यो केल्यो. गिलान 176 बॉलांनी नाबाद 119 धांवड्यो केल्यो.

मोखीचो फाटलाव करपी बांगलादेशान सादूरतायेन सुरवात केली. झाकीर हसन आनी शदमन इस्लाम हाणें पयले विकेटी खातीर 62 धांवड्यांची भागिदारी केली.

ही जोडी फास्ट बॉलर जसप्रीत बुमरान फोडली. यशस्वी जयस्वालान झाकीर हसनाची उत्कृश्ट कॅच धरली.

आर आश्विनाक संघर्श करचो पडलो. पूण, हार मानूंक ना. खेळपट्टींतल्यान मजत मेळची म्हणून आश्विनान आपली गती उणी केली. हाचो ताका फायदो लेगीत जालो. ताणें दुसरो ओपनर शदमन इस्लामाक बाद केलो. ते उपरांत आश्विनान मोमिनूल हकाक बोल्ड केलो. मुश्फिकूर रहिमान जलद रितीन धांवड्यो करपाक लागलो. पूण, ह्या यत्नांत तो आश्विनाचे बॉलिंगेचेर लोकेश राहुलाक कॅच दिवन तंबूंत परतलो.

उण्या उजवाडाक लागून तिसऱ्या दिसाचो खेळ थारावीक वेळा पयलीं थांबोवचो पडलो. खेळ थांबलो त्या वेळार मुखेली नाजमूल 60 बॉलांनी 51 धांवड्यो करून खेळटालो.