भांगरभूंय | प्रतिनिधी
खबरां संस्था
मीरपूरः तिसरे आनी निमणे टी-20त बांगलादेशाच्या बायलांच्या पंगडान भारताक 4 विकेटींनी हारयलें. मात तीन मॅचींची ही माळ भारतान 2-1 अशी जिखली. बांगलादेशाच्या शमिमा सुल्ताना सगल्यांत चड 42 धांवड्यो करून पंगडाक जैत मेळोवन दिलो आनी तें प्लेयर ऑफ मॅच थारलें. मीरपूर हांगा जाल्ले हे मॅचींत भारतान टॉस जिखून बॅटिंग करून 20 ओव्हरींत 9 आवट 102 धांवड्यो केल्यो. बांगला देशान 18.2 ओव्हरींत 6 गडी वोगडावन 103 धांवड्यांचें लक्ष्य पुराय केलें.
भारताच्या डावाची सुरवात बरी जाली ना. पंगडाच्या 7 धांवड्यांचेर ओपनर स्मृती मंधाना एक धांवडेचेर आवट जालें. कॅप्टन हरमनप्रीत कौरान 40 धांवड्यो केल्यो. जेमिना रॉड्रिग्जान 28, यास्तिका भाटियान 12 आनी शेफाली वर्मान 11 धांवड्यो केल्यो. ह्यो चार खेळगडी सोडल्यार बाकीच्यांक धाचो आंकडो हुबपाक जमलें ना. बांगलादेशा वतीन रबेया खानान 3 विकेटी घेतल्यो. सुल्ताना खातूनान 2 विकेटी घेतल्यो.
103 धांवड्यांचो फाटलाव करतना बांगलादेशाच्या शमिमा सुल्तानान सगल्यांत चड 42 धांवड्यो केल्यो. निगार सुल्तानान 14, सुल्ताना खातूनान 12 आनी शांती रानीन 10 धांवड्यो केल्यो. भारताच्या मिन्नू मणी आनी देविका वेद्यान दरेकी दोन विकेटी घेतल्यो.
बांगलादेशाच्या बायल पंगडाची भारता आड हे तिसरें जैत आसा. दोनूय पंगडां मदीं आतां मेरेन 16 टी-20 मॅची जाल्यात. 13 मॅची भारतान जिखल्यात हरमनप्रीत कौराक प्लेयर आफ सिरीजाचो पुरस्कार फावो जालो. ताणे हे माळेंत 94 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
