भांगरभूंय | प्रतिनिधी
पणजीः गोंय श्रमीक पत्रकार संघटणेच्या (गूज) अध्यक्षपदाचेर नामनेचे फोटो पत्रकार राजतिलक नायक हांची परतून एक फावट निवड जाली. ते फाटोफाट तिसरे खेपे वेंचून आयल्यात. जाल्यार 10 पत्रकारांचे संघटणेच्या कार्यकारी मंडळ पदाचेर निवड जाली. तातूंतले तीग वांगडी प्रुडंट मिडिया नेटवर्कांतले आसात.
शेनवारा सकाळीं गूज कार्यालयांत संघटणेची बसका जाली. उपरांत वेंचणुकेक सुरवात जाली. वेंचणूक जावन रोखडीच मतमेजणी जाली. अध्यक्षपदाचे सर्तींत राजतिलक नायक आनी अवीत बगळे सर्तींत आशिल्ले. वेंचणूक दोन फेरयेंत जाली. पयले फेरयेंत नायक हांकां 103 मतां जाल्यार बगळी हांकां 40 मतां पडलीं. दुसरे फेरयेंत नायक हांकां 32 जाल्यार बगळी हांकां 13 मतां पडलीं.
मतमेजणेचे अखेरेक नायक हांकां 135 मतां मेळ्ळीं आनी व्हडा मतांची आघाडी घेवन ते वेंचून आयले. जाल्यार तांचे प्रतिस्पर्धी बगळी हांकां 53 मतां पडलीं. जाल्यार अजय लाड, अमर पाटील, अम्रेश परब, औदुंबर शिंदे, संदीप देसाय, स्वप्नील तारी, उपेंन्द्र नायक, वासुदेव पागी, विठ्ठल गावडे पारवाडकर आनी विल्यम रॉड्रिग्स हांची कार्यकारी समितीचेर निवड जाली. लाड हांकां 118 मतां, पाटील हांकां 97, परब हांकां 125, शिंदे हांकां 105, देसाय हांकां 120, नायक हांकां 100, पागी हांकां 139, पारवाडकार हांकां 91 आनी रॉड्रिग्स हांकां 90 मतां मेळ्ळीं.
प्रुडंट मिडिया नेटवर्कचे स्वप्नील तारी, अमर पाटील आनी अजय लाड हे तीग जाण गुजच्या कार्यकारी समितीचेर वेंचून आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
