भांगरभूंय | प्रतिनिधी
शेटगांवकार : जूनांत आसतलो ब्रीज अभ्यासक्रमाचेर भर
पणजी : यत्ता तिसरेच्या पुस्तकांचे छपायेक कळाव जाल्ल्यान हीं पुस्तकां विद्यार्थ्यांक जुलयांत उपलब्ध जातलीं. जूनांत तिसरेच्या विद्यार्थ्यांक पुस्तकां बदला शिक्षकांचो भर ब्रीज अभ्यासक्रमाचेर आसतलो, अशी म्हायती जीएससीईआरटीच्यो संचालक मेघना शेटगांवकार हांणी दिली.
हेर यत्तांचीं पुस्तकां उपलब्ध जाल्यात. त्या, त्या विद्यालयांनी पुस्तकां पावोवपाचो वावर सुरू आसा. येत्या सप्तका मेरेन हो वावर पुराय जातलो. पयली ते आठवी मेरेन फुकट शिक्षण दिवपाचें केंद्र सरकाराचें धोरण आसा. हाका लागून पयली ते आठवी मेरेनचीं सगळीं पुस्तकां सरकार फुकट दिता. गोंय राज्य शिक्षण संशोधन आनी प्रशिक्षण मंडळा वतीन (जीएससीईआरटी) ह्या पुस्तकांचें वांटप जाता. णववी आनी धावेच्या पुस्तकांचीं शालान्त मंडळा वतीन छपाय जाता. हीं पुस्तकां दुकानांनी उपलब्ध आसात. णववी आनी धावेचीं पुस्तकां मात विद्यार्थ्यांक विकतीं घेवचीं पडटात, अशी म्हायती शेटगावकार हांणी दिली. अंदूं सावन यत्ता तिसरी आनी सवी खातीर एनईपी लागू जाल्या. हाका लागून अभ्यासक्रमांत बदल जाला. तिसरेच्या पुस्तकांत बदल जाल्ल्यान तीं उपलब्ध जावपाक कळाव जातलो. एक्टीविटी बेस्ड लर्निंगाचेर भर आशिल्ल्यान पुस्तकांक लागून विद्यार्थ्यांचें लुकसाण जावचें ना. यत्ता तिसरे खातीर ब्रीज अभ्यासक्रम सक्तीचो आसा. जूनांत ब्रीज अभ्यासक्रमाचेर भर दिवपाच्यो सुचोवण्यो जीएससीईआरटीन विद्यालयांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
