तिसरें युवा कोंकणी कथा संमेलन ३०, ३१ जानेवारीक

भांगरभूंय | प्रतिनिधी

पणजी: गोंय विद्यापीठांतले शणै गोंयबाब भाशा आनी साहित्य महाशालेच्या कोंकणी अध्ययन शाखेच्या जोड पालवान कोंकणी सरस्पत मंडळान ‘तिसरें युवा कोंकणी कथा संमेलन’३० आनी ३१ जानेवारीक विद्यापीठाच्या सेमीनार हॉलांत आयोजीत केलां.
कोंकणी कथेच्या दालनांत युवा कथाकार तयार जावचे हो उद्देश दोळ्यां मुखार दवरून विद्यापीठ हें संमेलन दर वर्सा घडोवन हाडटा. कथाकारांचे प्रतिभेक चालना मेळचे खातीर संमेलनांत तरेकवार सत्रां आयोजीत केल्यांत.
बिरेस्तारा, ३० जानेवारीक सकाळीं १०.३० वरांचेर संमेलनाचें उक्तावण जातलें. मुखेल सोयरी म्हूण जेश्ठ साहित्यीक हेमा नायक हाजीर रावतली. संमेलनाध्यक्ष म्हूण साहित्यीक रामनाथ गावडे हाजीर आसतले. खासा आमंत्रीत म्हूण महाशालेची अधिश्ठाता प्रो. अनुराधा वागळे, येवकाराध्यक्ष डॉ. हनुमंत चोपडेंकार, कार्यध्यक्ष प्रा. सानिका गांवकार आनी सरस्पत मंडळाचे अध्यक्ष राणी कामत हाजीर आसतलीं. ह्या वेळार डॉ. संपदा सवासे हांचो ‘अमुल्य देण’ हो कथा संग्रह प्रकाशीत जातलो.
उक्तावणां उपरांत सकाळीं ११:३० वरांचेर देविदास कदम हांचे मूळ स्वर उलोवप जातलें. पयल्या सत्रांत दनपरां २ वरांचेर कथा लेखक संयज बोरकार हांची मुलाखत सान्वी खांडेपारकार आनी चित्ररेखा सावंत घेतलीं. ३ वरांचेर वेंचीक युवा कथाकारांच्या कोंकणी कथेचें वाचन जातलें. हें सत्र प्रा. नरेश नायक हांचे अध्यक्षताये खाला जातलें.
शुक्रार, ३१ जानेवारीक सकाळीं १० वरांचेर ‘कथा लेखन कार्यशाळा’ सत्र जातलें. ह्या वेळार प्रा. गोरक शिरसाट आनी प्रा. जोफा गोन्साल्वीस मार्गदर्शन करतलीं. दनपरां १२ वरांचेर समारोप सुवाळो आनी इनामां वांटप सुवाळो जातलो. मुखेल सोयरे म्हूण कथाकार मिलिंद म्हामल हाजीर आसतले. वांगडा संमेलनाध्यक्ष गावडे, येवकाराध्यक्ष डॉ. चोपडेंकार, कार्याध्यक्ष प्रा. सानिका गांवकार आनी राणी कामत हाजीर आसतलीं.
कथा लेखन सर्तीक पयलें इनाम ५००० रुपया रोख, यादस्तीक आनी प्रमाणपत्र. दुसरें इनाम ३००० रपया रोख, यादस्तीक आनी प्रमाणपत्र आनी तिसरें इनाम २००० रुपया रोख, यादस्तीक आनी प्रमाणपत्र अश्या स्वरूपाचीं इनामां आसतलीं. चड म्हायती खातीर राणी कामत (९६८९८३७९२७) वा सचीव चित्ररेखा सावंत (९७६५३१७६८४) हांचे कडेन संपर्क करचो, अशें कळीत केलां.