भांगरभूंय | प्रतिनिधी
पुश्टीक जेवणाचो उणाव आनी चुकीचे जिणे पद्दतीक लागून हाडांच्यो समस्या वाडटात. हाचो परिणाम भुरगे आनी तरणाट्यांचेरूय जाता. तुमचीं हाडां जर बेगीनूच जाण्टीं जावचीं न्हय वा ऑस्टियोपोरोसिस सारकिल्ल्या समस्यांक तुमकां तोंड दिवचें ना, जाल्यार तुमी आयच्यान तुमच्या जेवणांत बदल करचो पडटलो. कॅल्शीयम आनी व्हिटॅमिन डी भरपूर आशिल्लें जेवण खावपाक सुरवात करात. सकयल दिल्लीं हीं खाणां भलायके खातीर फायद्याचीं. तशेंच भलायकी बरी दवरपाक मजत करतात.
दूद आनी दुदाचे जिन्नस
दूद, धंय, चीज आनी ताक हीं कॅल्शियमाचीं बरी स्त्रोत. हाडां घट दवरपाक आनी उंचाय वाडोवपाक दुदाचें म्हत्व तुमी आयकलां आसतलें. तशेंच दुद आनी हेर दुदाचे जिन्नस तुमच्या हाडांचो आयुश्यभर राखपाक मदत करतात. दुदाचे जिन्नस फकत हाडां घट करिनात दंताचे भलायके खातीरूय फायद्याचे आसतात.
पांचवी भाजी
पांचवे भाजयेंत कॅल्शियम चड प्रमाणांत आसता. तशेंच तातूंत के जीवनसत्व भरपूर आसता, जें कॅल्शियम हाडां मेरेन व्हरपाक आदार करता. तुमच्या आहारांत पालक आनी ब्रोकोली हांचो आस्पाव करूं येता. पाचवी भाजी भलायकी आनी कूड घटमूट करपाक आदार करता.
तीळ आनी बदाम
तिळांत कॅल्शियमाचें बळिश्ट स्त्रोत आसता. देखून भुरगीं, तरणाटे, जाण्टे आनी बायलांनी ते खावचें. बदाम आनी अक्रोडांत कॅल्शियम, मॅग्नेशियम आनी फॉस्फरस हांचोय आसपाव जाता. जे भलायके खातीर गरजेचीं. नेमान ड्राय फ्रुट्स खाल्यार हाडां घट जातात. तशेंच तांची लवचीकता वाडटा.
नाचणे
नाचणे हें भारतांत पिकयल्लें एक धान्य. नाचणे हो कॅल्शियमाचो बरो स्त्रोत. नाचण्यांत गंव वा तांदळां परस कितल्याशेच पटीन चड कॅल्शियम आसता. नाचणे, पिठाची भाकरी वा पोळी खाल्यार ऑस्टियोपोरोसिसचो धोको उणो जाता. देखून भुरगीं ते जाण्टे मेरेन सगळ्यांनी नाचणे खावपाक जाय.
संत्रां
संत्रांत व्हिटॅमिन सीचो बरो स्त्रोत आसता. ताज्या संत्रांचो रोस भलायके खातीर फायद्याचो. ताज्ज्या संत्रांचो रोस नेमान पियेल्यार कुडीक कॅल्शियम आनी व्हिटॅमिन डी मेळटा. हाका लागून हाडां घट जातात. तशेंच ऑस्टिओपोरोसिस सारक्या रोगांचोय धोको उणो जाता. देखून, तुमच्या आहारांत संत्रांचो आस्पाव करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
