भांगरभूंय | प्रतिनिधी
माशेल : तिवरें-वरगांवच्या उपसरपंच पदार एकनाथ परब हांची भोवमतान निवड जाली. विरोधी गटाचे पंच फ्रान्सिस लोबो हारले. ह्या वेळार सरपंच जयेश नायक, पंच एकनाथ परब, अपर्णा आमोणकार, संजीव कुंडयकार, यशवंत जल्मी, फ्रान्सिस लोबो, सिद्धार्थ गाड, शिल्पा वेरेंकार आनी सुमित्रा नायक हजर आशिल्ले.
चवथी पयलीं उपसरपंचपदा खातीर सत्ताधार्यांचें एक मत बाद जाल्ल्यान विरोधी गटांतली शिल्पा वेरेंकार हांची उपसरपंच म्हणून निवड जाल्ली. मात वट्ट तीन वरांनी तांचेर अविस्वास थाराव दाखल केल्लो. निवड जाले उपरांत आदले मंत्री आनी आमदार गोविंद गावडे हांणी एकनाथ परब आनी तांच्या समर्थकांक परबीं भेटयलीं.
सेगीत जावपी अविश्वास थारावाक लागून आनी सत्तासंघर्शाक लागून उदरगतीच्या कामां कडेन आडनदर जाता. आतां परत अविस्वास थाराव येवपाची शक्यताय आशिल्ल्यान सरपंचपदा खातीर इत्सूक पंचाचो खेळ सुरू आशिल्ल्याची चर्चा आसा. पड्ड्या फाटल्यान खुबश्यो चर्चा रंगतना दिसतात.
उपसरपंच पदार निवड जाले उपरांत, आतां सरपंच पदार कांय जाणांचें लक्ष आसा. खर संख्याबळ जमले उपरांतूच अविस्वास थाराव हाडटले अशी चर्चा नेटान गांवांत चालू आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
