भांगरभूंय | प्रतिनिधी
दोडामार्ग : हतयाच्या हल्ल्यांत ७० वर्सां पिरायेच्या शेतकाराचो जीव वचपाची घडणूक मंगळारा सकाळीं घडली. सकाळीं सुमार ७ वरांचेर मोर्ल्यां आपले बागायतींत काजू एकठांय करपा खातीर गेल्लो लक्ष्मण गवस हांचेर हतयान हल्लो करीत तांकां पांयां पोंदा चिडि्डल्यान जाग्यारूच मरण आयलें.
मजगतीं, हे घडणुकेक लागून सिंधुदुर्ग जिल्ह्यांत बरोच बोवाळ सुरू जाला. हतयाचो हो उपद्रव आडावपा खातीर रान खातें आनी राज्यकर्ते आतां तरी दोळे उगडटले काय? असो प्रस्न दोडामार्ग म्हालांतल्या शेतकरी वर्गान हजर केला.
हे विशीं कळटांच दोडामार्गचे वनपाल किशोर जंगले आनी तांची टीम घडणुके सुवातेर गेली. हे घडणुकेचो पंचनामो केलो.
मजगतीं हे विशीं मोर्ले गांवांत बोवाळ जाला. मात हे घडणुकेचेर उलोवपाक कोणूच मुखार येनाशिल्ल्याचें चित्र पळोवपाक मेळटा. म्हालांतले जायते लोकप्रतिनिधी, पुलीस प्रशासन हें मोर्लें गांवांत गेल्यात.
हे घडणुके उपरांत तरी हतयांक तिलारी खोर्यांत धाडपाची सपनां पळोवप्यांनी, हतयांक धरप हीच काळाची गरज हें तितलेंच गरजेचें आसा. जिल्ह्याच्या वनाधिकार्यांनींय जनतेच्या सहन शक्तीची शीम पळयनासतना हत्ती धरपाचे मोहिमे विशीं बेगोबेग पावलां उबारप गरजेचें, अशें कांय तरणाट्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
