भांगरभूंय | प्रतिनिधी
पणजी: तिळारी घाटां वेल्यान धांवपी पणजी ते कोल्हापूर ही एसटी सेवा महाराष्ट्र राज्य परिवहन महामंडळान १ जुलय २०२४ सावन बंद केल्ली. ही आतां परत सुरू जाल्ल्यान ह्या मार्गावेल्यान यो- वच करपी प्रवाशी समाधानी जाल्यात. बर्याच काळा उपरांत ही बस चंदगड म्हालांतल्या कोदाळ गांवांत पावले उपरांत थंयच्या ग्रामस्थांनी हे बसीक येवकार दिलो. हे कार्यावळींत खुद्द थळावे आमदार शिवाजी पाटील, तशेंच सरपंच प्रवीण गवस हजर आशिल्ले.
२०२४ वर्सा पावसांत थंयची राखणे कड कोसळपाक लागिल्ल्यान तिळारी घांटाचो रस्तो येरादारी खातीर धोक्याचो जाल्लो. तें लक्षांत घेवन कोल्हापुरच्या जिल्लोधिकार्यांनी एसटी सेवा १ जुलय ते ३१ ऑक्टोबर २०२४ अशी तीन म्हयने बंद दवरपाचो आदेश जारी केल्लो. मात, ३१ ऑक्टोबर सोंपलो तरी ही सेवा परत सुरू जावंक ना. उपरांत प्रवाशीय उबगले. राजकी फुडार्यांनी एसटी महामंडळाक जायते फावटीं पत्रूय बरयलें. मात बांदकाम खात्या कडल्यान जो मेरेन घांटमार्ग सुरक्षीत आशिल्ल्याचें पत्र मेळना, तो मेरेन प्रवासी येरादारी आदले वरी जावपाक शकना, अशें महामंडळान स्पश्ट केल्लें. आतां बांधकाम खात्यान पाचवो बावटो दाखयले उपरांत महामंडळान सेवा आदले वरीं सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
