भांगरभूंय | प्रतिनिधी
भांगरभूंय । प्रतिनिधी
म्हापशेंः बार्देश तालुक्यांक तिळारी धऱणांतल्यान उदका पुरवण जाता. सध्या तिळारी धरणांत उदकाची पातळी 93.90 मीटर आसा. धरणांत जाय तितल्या प्रमाणांत उदकाचो साठो आसून लेगीत बार्देश तालुक्यांत उदकाची समस्या नित्याचीच जावपाक लागल्या.
तिळारी धरणांतल्या उदकाचेर बार्देशांतले अस्नोडें, पर्वरी आनी पेडणे तालुक्यांतले चांदेल हे उदका शुद्धिकरण प्रकल्प चलतात. शिंपणावळी खातीर बार्देश, पेडणे आनी दिवचल तालुके तिळारींतल्या उदकाचो वापर करतात. धरणांत जाय तितलें उदक आसतनाय ताचो जाय तसो उपेग जायना अशें दिसपाक लागलां.
अस्नोडें उदका शुद्धिकरण प्रकल्प 92 एमएलडीचो आसा. तातूंत 105 एमएलडी मेरेन उदक शुद्ध करतात. पर्वरेचो प्रकल्प 20 एमएलडीचो आसा. ह्या दोनूय प्रकल्पांतल्या बार्देश तालुक्याक 125 एमएलडी उदका पुरवण जाता.
तरीय हें उदक तालुक्यांतल्या मुखेल टांकयांनी येना. ताका लागून बार्देशांतल्या सातून मतदारसंघांत उदक मेळना, दरेका मतदारसंघांत 16 तें 17 एमएलडी उदक मेळपाक जाय. मात जायते खेपे तें अर्द्याचेर पावता. ताका लागून उदक खंय घुंवडायतात ही संशोधनाची गजाल आसतनाय उदका पुरवण विभागाचे अधिकारी उदका शुद्धिकरण प्रकल्पांतल्यान जाय तितल्या उदकाची पुरवण जायना अशीं कारणा दितात. उदक खंय ना जाता हाचो अभ्यास वा तपासणी कोणूच करना.
सध्या बार्देशांत उदका उणाव आसा. जायत्या वाठारांनी एक दीस सोडून उदका पुरवण करतात. कांय वाठारांत नळांक एक वर लेगीत उदक येना. बंदीरवाडो, आसगांव हांगच्या कांय वाठारांत लोकांक वर्स भर टॅन्करांचेर निंबून रावचें पडटा. तालुक्यांत उदका उणाव आसतना आनी कच्च्या उदकाचो उणाव नासतना अजून नवे उदका शुद्धिकरण प्रकल्प उबारपाक तालुक्यांतले लोक प्रतिनिधी लक्ष दिनात. उदका पुरवण कार्यालयाचेर मोर्चा व्हेल्या उपरांत कांय दीस नळांक उदक येता आनी उपरांत स्थिती आशिल्ली तशी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
