भांगरभूंय | प्रतिनिधी
पावसा उपरांत मार्च मेरेन तरी गोंयांत उदकाची टंचाय आसताच अशें ना. फुडले दोन म्हयने तिळारी कानाल दुरुस्तेक लागून बंद आसतलो. महाराष्ट्र सरकार ही दुरुस्ती करता. ताका लागून उत्तर गोंयचे उदका पुरवणेचेर परिणाम जावं येता. तशें, गोंयांत सध्या तरी फावो तितलें उदक आसा. ताचें योग्य पद्दतीन वितरण जावप म्हत्वाचें. तिळारीचें उदक येवचें ना, त्या काळांत आमी उदकाची पर्यायी वेवस्था केल्या, अशें सरकारान स्पश्ट केलां. फावो तितलें उदक मेळटलें कांय ना, तें 15 आॅक्टोबरा उपरांत कळटलेंच. वर्स अखेरेक गोंयांत पर्यटक व्हड प्रमाणांत आसतात. ताका लागून 10 डिसेंबर मेरेन कानालाचें काम पुराय करपाची विनवणी गोंयान महाराष्ट्राक केल्या. दिल्ले तारखे मेरेन तें जातलें, अशी आस्त. कारण सरकारी कामां एकदां सुरू जालीं काय तीं केन्ना पुराय जायत, हें कोणूच सांगूंक शकना. पूण, उदक ही जिणे गरजेची वस्त आशिल्ल्यान काम शक्य तितले बेगीन सोंपतलें हाचेर दोनूय राज्यांक नदर दवरची पडटली. तिळारी धरण उबारून 30 वर्सां वयर जावन गेलीं. म्हणटकूच कानाल आनी एकूणच यंत्रणेची दुरुस्ती करप गरजेचें. नशीब, रस्त्यां प्रमाण धरणांचो दर्जो नासता!
म्हादय न्हंयेचेर संकश्ट आयलां. जाय तितलेंच उदक वळयतले अशें कर्नाटक म्हणटा, मात ताचेर कितलो विस्वास दवरपाचो तें कळना. न्यायालय, लवादाचो आदेश आसतना तांणी कळसा, भांडुराचें काम चालूच दवरिल्लें. हाचे वयल्यान ते गोंया सारक्या ल्हान राज्याक भियेतलें अशें दिसना. हे वटेन गोंयांतल्यो कांय न्हंयो प्रदुशीत जाल्यात. देखून सगलेंच उदक पिवपा खातीर वापरूंक मेळना. कांय उदका स्रोतूय इबाडल्यात. गांवांतल्या तळीं, व्हाळां कडेन थळाव्या स्वराज्य संस्थांची आडनदर जाल्या. नळाचें उदक आयतें घरांत मेळटा म्हणटकूच लोकांकूय उदका टंचायेची व्हडलीशी भिरांत दिसना. गीम तापपाक लागलो काय थोड्या गांवांनी उदका खातीर बोवाळ जाता तितलोच. 40 वर्सां पयलीं गांवांगांवांनी बांयो आसताल्यो. थंय उदका खातीर गर्दी पडटाली. उदका पुरवण खातें टँकर धाडटालें. लोक घिट्टी करून उदक भरताले. आतांय येता, पूण कांय कडेन पयशे दिवन तो मागयतात. आयज एखादो आडवाद सोडल्यार बांयो दिश्टी पडनात. बिल्डरांनी त्यो पुरोवन वयर बिल्डिंगो बांदल्यात. लोकांक दिसता, एक- दोन दीस उदक मेळचें ना. टँकर मागोवया मरे… देखून बांयो आनी हेर उदका स्रोत सांबाळपा कडेन आमची आडनदर जाल्या. म्हादय सुकत जाल्यार तांचे म्हत्व कळटलें.
पियेवपाचें 150 एमएलडी उदक तिळारीच्यान येता. तितलें उदक (उत्तर गोंया खातीर) अस्नोडें, अणजूणें प्रकल्पातंल्यान घेवपाचें थारलां. ही पर्यायी वेवस्था दोन म्हयने बरे भशेन जावं, इतलेंच मागुया. खरें म्हणल्यार आतां प्रत्येक गोंयकारान घर वा इमारती कुशीक बांय मारून पंपा वरवीं उदक वयर चडोवपाक जाय. नळाच्या उदकाचेरूच अवलंबून रावप घातमारें थारूं येता. कारण हालींसराक बरेच कडेन नळांतल्यान उदका बदला वारेंच चड येवपाक लागलां खंय. तिळारीचें उदक शेतां, भाटां, पोरसांकूय वापरतात. पावस सुरू आशिल्ल्यान शेतां, भाटांक उदकाची गरज पडची ना, अशें उदका अधिकाऱ्यांक दिसता. मात फाटले आठ दीस पावस पडूंक ना. कानालाचें काम सोंपतकूच उदक येतलेंच अशें ना. मुखार आनीक कांय दीस लागूं येतात. तेन्ना आतां उदक सांबाळून वापरप, होवूय उपाय लोकांक करचो पडटलो. कांय जाणांच्या मतान, गोंयांत गरज तितलो उदका सांठो सदांच आसता. पूण, उदकाचें वितरण योग्य पद्दतीन जायना. मदीं कांय आडमेळींय येतात. पायप लायनी फुट्टात, उण्या दाबाक लागून उदक वयर चडना….! तशें आसा जाल्यार उदका पुरवण खात्यान हाचेर बेगीन उपाय काडचो.
सगलीं धरणां भरिल्ल्यान उदकाचो उणाव येवचो ना, अशेंय उदका अधिकाऱ्यांनी सांगलां. न्हंयांतलें उदक कानालांनी सोडपाचें आनी तें थंयच्यान उदका प्रकल्पांत हाडपाचेंय थारलां. कुशावतीचें उदक नावेले मेरेन हाडून तें कानालांतल्यान पंप करतले. हेर न्हंयांचे बाबतींतूय अशेंच करतले. ताका लागून धरणांतल्या उदकाची बचत जातली. सध्या बांद उबारपाचें काम चलता. कांय कडेन ताका विरोध जाता. तरीय सरकारान 100 बांदांची येवजण आंखल्या. ताका लागून न्हंयांचें उदक वापरूंक मेळटलें. पूण, ह्या बांदांक लागून हुंवार येवपाक जायना, हेंवूय पळोवचें पडटलें. तिळारी कानालाची दुरुस्ती जाय मेरेन उदकाची कसलीच समस्या येवची ना, अशें उदका विभागान स्पश्ट केलां. तशेंच जावं. हो पर्यटन हंगाम हेंवूय कोणें विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
