भांगरभूंय | प्रतिनिधी
म्हयन्याभरा सावन उदकाचो उणाव, पर्वरीचो प्रकल्प पडलो बंद
भांगरभूंय । प्रतिनिधी
म्हापशें: खारजाचे दुरुस्तीक लागून तिळारी धरणाचें गरजेचें कच्चें उदक अस्नोडेंच्या उदक शुद्धीकरण प्रकल्पाक मेळना. हाचो परिणाम म्हणल्यार म्हापशें शारा सयत बार्देस म्हालांत फाटल्या म्हयन्याभरा सावन उदकाचो उणाव निर्माण जाला. तातूंत पर्वरी उदक प्रकल्प लेगीत उदक नाशिल्ल्यान बंद पडला.
तिळारीचो पर्वरी आनी कळंगूटेक जोडपी पायपलायन आशिल्लें खारज म्हापशेंच्या धुळेरांत नादुरुस्त जाला. ह्या खारजाचें दुरुस्तीकाम शिंपणावळ खात्यान हातांत घेतलां. फाटलो म्हयनोभर हें काम चल्लां. ताका लागून तिळारी धरणाचें खारजा वरवीं अस्नोडें उदक शुद्धीकरण प्रकल्पांत येवपी कच्चें उदक बंद केलां.
अस्नोडेंचो उदक शुद्धीकरण प्रकल्प हो तिळारीच्या कच्च्या उदकाचेर निंबून आसा. तिळारीचें उदक बंद जाल्ल्यान आमठाणे धरण आनी पार न्हंयेंतल्यान शिंपणावळ खातें उदक शुद्धीकरण प्रकल्प चलयता. पूण ह्या दोनूय कडल्यान फावोशा उदकाची पातळी मेळानाशिल्ल्यान उदक शुद्धीकरण प्रक्रियेचेर परिणाम जाला.
ते भायर खारजाचे दुरुस्तीक लागून पर्वरी उदक शुद्धीकरण प्रकल्प लेगीत कच्चें उदक मेळानाशिल्ल्यान बंद पडला. हाका लागून म्हापशें शारा सयत बार्देस म्हालांतल्या सातूय मतदारसंघांनी आनी दिवचल म्हालांतल्या कांय वाठारांनी उदकाची समस्या निर्माण जाल्या. ह्या सगळ्या मतदारसंघांनी अस्नोडें उदक शुद्धीकरण प्रकल्पा वरवीं 18 ते 19 एमएलडी उदका पुरवण करताले, पूण कच्चें उदक नाशिल्ल्यान आतां ही पुरवण अर्द्यार पावल्या. कच्च्या उदकाची समस्या जो मेरेन सुटना ते मेरेन उदकाची समस्या कायम उरतली, अशी म्हायती भौशीक बांदकाम खात्याच्या उदका पुरवण विभागा वतीन मेळ्ळ्या. मात धुळेरांतल्या नादुरुस्त खारजाचें काम चांचणी सयत पराय जाले उपरांतूच आनी त्या खारजांत तिळरी धरणाचें उदक आदलेवरी सोडले उपरांतूच उदक पुरवणेची समस्या पयस जावपाची शक्यताय आसा.
ताकतिकेन उपाय काडचोः रायन ब्रागांझा
म्हापशें शारांतल्या आंगड तशेंच हेर वाठारांनी फाटल्या म्हयन्याभरा सावन उदकाची गंभीर समस्या निर्माण जाल्या. सकयल्या वाठारांतल्या नळांक लेगीत उदक येना. लोकांच्या घरांनी सणा परबें वेळार उदक नासता. हे समस्येचेर संबंदितांनी ताकतिकेन उपाय काडून लोकांक फावोशें उदक दिवचें, अशी मागणी आदले नगराध्यक्ष रायन ब्रागांझा हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
