भांगरभूंय | प्रतिनिधी
उदकाचो अदमास येवंक नाशिल्ल्यान घडली दुर्दैवी घडणूक
म्हापशें: कुचेली- म्हापश्यां दत्तप्रसाद कॉलनींत आशिल्ल्या उदका स्रोत खात्याच्या पंप हावसा कुशीक तिळारी धरणाच्या कानालांत पेंवपा खातीर देंविल्ल्या ओंकार प्रशांत प्रभुदेसाय (26, रा. शेटयेवाडो म्हापशें) ह्या तरणाट्याक बुडून मरण आयलें.
ही दुर्दैवी घडणूक काल (बिरेस्तारा) दनपारां एक वरांच्या सुमाराक घडली. मयत ओंकार आनी ताचो इश्ट आदर्श नायक (हरमल) हे दोगूय घडणूक थळार कानालाच्या शेजरा दनपारा आयिल्ले. मजगतीं, पंप हावसा कुशीक उदक सांठोवन दवरिल्ल्या कानालांत पेंवपा खातीर ओंकारान कपडे काडून उडी मारली. ह्या वेळार तो बुचकळपाक लागतकच ताच्या इश्टान ताका उदका भायर काडपाचो यत्न केलो. पूण ओंकार उदकांत बुडलो. इश्टाक वाटावपा खातीर आदर्शान बोवाळ घालतकच दत्तप्रसाद कॉलनींतल्या लोकांनी घडणूक थळार धांव घेतली. तशेंच पुलीस कंट्रोल रुमा कडेन संपर्क सादून घडणुकेची म्हायती दिली.
तेचबरोबर म्हापशें पुलीस तशेंच उजो पालोवपी दळाचे जवान घडणूक थळार दाखल जाले. उजो पालोवपी दळाचे उपअधिकारी प्रकाश कान्नाईक हांच्या फुडारपणा खाला दळाच्या जवानांनी मयताची कूड व्हड यत्नान उदका भायर काडली.
म्हापशेंचे पुलीस उपनिरिक्षक अभिजीत नायक, उत्क्रांतराव देसाय, हवालदार आशिर्वाद नायक आनी वांगडी पुलिसांनी पंचनामो करून कूड मरणा उपरांतचे तपासणे खातीर गोमॅकाँत धाडून दिल्या. फुडलो तपास पुलीस करतात. आयज (शुक्रारा) दनपारां मयताचे कुडीचेर निमाणे संस्कार जातले.
मजगतीं, मयत ओंकार हो जाण्ट्या प्रभुदेसाय जोडप्याचो एकलोच पूत आशिल्लो. ताच्या ह्या अपघाती मरणाक लागून ह्या जोडप्याचेर संकश्ट कोसळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
