भांगरभूंय | प्रतिनिधी
-कला अकादमी अध्यक्ष गोविंद गावडे हांची हमीपणजीः कला अकादमीच्या ‘अ’ गट नाटक सर्तींत फाटलीं तीन वर्सां वांटो घेतिल्ल्या सगल्या संस्थांच्या पदाधिकाऱ्यां कडेन बेगिनूच बसका जातली आनी सर्तीच्या नेमाचेर चर्चा जातली. तांच्या संमतीन कांय नेम बदलूं येतात अशें कला आनी संस्कृती मंत्री आनी कला अकादमीचे अध्यक्ष गोविंद गावडे हांणी सोमारा आमच्या प्रतिनिधी कडेन उलयतना सांगलें.
अंदूंचे नाटक सर्तींत मंगेशीच्या मांगीरीश युथ क्लब संघटणेचे दक्ष शिरोडकार हांणी दिग्दर्शीत केल्ल्या ‘तिऱ्हाईत’ नाटकान पुराय सर्तीचेर म्होर सोडली. पूण ‘ब’ गट नाटकांत काम करपी अभिनेत्यान तें ‘तिऱ्हाईत’ ह्या ‘अ’ गट नाटकांत केलें. हाचो ‘तिऱ्हाईत’ नाटकाचेर व्हड परिणाम जालो. कला अकादमीन कला अकादमीच्या संविधानाच्या 16 व्या नेमाचो भंग केला असो आरोप करून कला अकादमीन हें नाटक वळेरेंतल्यान काडून उडयलें. ते खातीर नियम क्रमांक 16 चर्चांत आयलो. भांगरभूंय दिसाळ्यान हे बाबतींत खबर उजवाडाक हाडले उपरांत जायते नाटककार, दिग्दर्शक, कलाकारांनी नाटक सर्तीच्या नेमाचेर टिका करपाक सुरवात केल्या. तातूंतल्या कांय जाणांक कला अकादमीन ‘तिऱ्हाईत’ कडेन अन्याय केला अशें दिसता. पूण कांय जाणांच्या मतान ‘तिऱ्हाईत’ हांणी एक चूक केली.
……………………………….
गोविंद गावडे हांचे म्हणणें….
-कला अकादमीच्या ‘अ’ आनी ‘ब’ ह्या दोनूय गटांत फाटलीं कितल्याशाच वर्सां सावन नेमा प्रमाण सर्त जातात. हे खेपे पयलेच खेपे ‘तिऱ्हाईत’ हांणी दोन नेमांचो भंग केला अशें उक्तें जालें. देखून ह्या नाटका आड कारवाय जाली.
– ‘ब’ गटांत काम केल्ल्या कलाकाराक त्याच वर्सा ‘अ’ गटांत काम करपाक मेळना अशें नेम क्रमांक 16 त म्हळां. ‘ब’ गटांतल्या अभिनेत्याचो अभिनय दिग्दर्शकाक आवडलो जाल्यार ताका आदींच बुक करून फुडल्या वर्साच्या नाटकांत ताका कास्ट करपाक मेळटा. पूण, मांगीरीश युथ क्लबान चूक केली.
– फाटल्या तीन वर्सांत ‘अ’ गट नाटक सर्तींत वांटो घेतिल्ल्या सगळ्या संघटणांच्या पदाधिकाऱ्यां कडेन आमी बसका घेवन तांचे कडेन नेमाचेर चर्चा करतले. ते प्रमाण तांच्या संमतीनूच कांय नेमांत दुरुस्ती करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
