भांगरभूंय | प्रतिनिधी
पणजीः ऑडिट अहवाल सादर करूंक नाशिल्ल्यान आनी नेम आनी अटींचो भंग केल्ल्यान तिरुमाला तिरुपती मल्टीस्टेट को-ऑपरेटिव्ह सोसायटीक फटको बसला. गोंयांत वेगवेगळ्या सुवातींनी 13 फांटे सूरू करपा खातीर दिल्ली एनओसी सहकार निबंधकांनी फाटीं घेतली.
मार्शेल महिला सहकारी बँक, विजनरी सहकारी बँक अशा बँकांतल्या गैरवेव्हारांक लागून हजारांनी ठेवीदारांक लाखांनी रुपयांचें लुकसाण जालां. सहकारी संस्था आनी बँकांनी जावपी गैरवेव्हारांतेर नियंत्रण दवरपाक सरकार अजून पुरायपणान येसस्वी जावंक ना. दुसरे वटेन नव्यो सहकारी सोसायटी आनी तांचे फांटेय उगडपाक लागल्यात. हे फाटभुंयेर तिरूमाला तिरूपती सोसायटीक 13 फांटे उगडपा खातीर दिल्ली मान्यताय सहकार निबंधकांनी रद्द केल्या.
सहकारी निबंधकांनी तिरुमाला तिरुपति बहुराज्य सहकारी क्रेडीट सोसायटीक 31 जुलय 2014 आनी 28 जून 2018 दिसा शाखा स्थापन करपा खातीर एनओसी दिल्ली. हालीं केल्ले तपासणेंतल्यान सकयल दिल्ल्यो गजाली दिसून आयल्यात-
० कायद्यान गरजेचो आशिल्लो ऑडिट अहवाल सोसायटीन सादर केल्लो ना.
० कागदपत्रांची तपासणी आनी पळोवणी करपाक सहकार्य ना.
० एनओसी जारी केल्ल्या अटींचें उल्लंघन.
० सहकारी निबंधकांच्या नोटिसांक प्रतिसाद दिवंक ना आनी हाजीर रावूंक ना.
ह्या कारणांक लागून सहकारी निबंधकांनी फांटे उगडपा खातीर दिल्ली एनओसी रद्द केला. एनओसी फाटीं घेतले उपरांत सोसायटी कडेन अर्थीक वेव्हार करतना वा गुंतवणूक करतना सामान्य लोकांनी सादूर रावचें अशें आदेशांत म्हणलां. कागाळ आसल्यार वा चड म्हायतीची गरज आसल्यार जनतेन संबंदीत अधिकाऱ्यां कडेन संपर्क सादचो अशें सहकार खात्यान कळयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
