भांगरभूंय | प्रतिनिधी
ऑडीट अहवाला सयत कागदपत्रां केलीं सादर
एनओसी रद्द करपाचो निर्णय फाटीं घेवपाची मागणी
हाचे फुडें चुकी जावच्यो नात, अशें पत्रांत आस्वासन
भांगरभूंय । प्रतिनिधी
पणजी : नोटिसो जारी करून लेगीत ऑडीट अहवाल आनी कागदपत्रां सादर करूंक नाशिल्ल्यान तिरुमला तिरुपती सहकारी क्रेडीट सोसायटीन पत्र बरोवन माफी मागल्या. सोसायटीच्या मुंबयंतल्या अधिकाऱ्यांनी सहकार निबंधकांची भेट घेवन ऑडीट अहवाला सयत कागदपत्रां सादर केलीं. कागदपत्रांची तपासणी सुरू आसा, अशी म्हायती सहकार निबंधक कार्यालयांतल्या अधिकाऱ्यांनी दिली.
नोटिसो जारी करून लेगीत ऑडीट अहवाल आनी गरजेचीं तीं कागदपत्रां सादर करूंक नाशिल्ल्यान सहकार निबंधकांनी तिरुमला तिरुपती मल्टीस्टेट सहकारी क्रेडीट सोसायटीची एनओसी रद्द करपाचो आदेश जारी केल्लो. हाका लागून सोसायटीक गोंयांत 13 फांटे सुरू करपाक दिल्ली मान्यताय रद्द जाली. हाका लागून गोंयच्या गुंतवणूकदारां मदी भिरांत निर्माण जाली. हाचे उपरांत सोसायटीच्या संचालक मंडळान धांवपळ सुरू केल्या. तांणी बुधवारा मुख्यमंत्री डॉ. प्रमोद सावंत हांची भेट घेतली.
ऑडीट अहवाल तशेंच सहकार निबंधकांनी मागिल्लीं कागदपत्रां बेगिनात बेगीन सादर करपाचे निर्देश मुख्यमंत्री डॉ. प्रमोद सावंत हांणी तिरुमला तिरुपती सोसायटीच्या संचालक/ प्रतिनिधी मंडळाक भेटी वेळार दिले. ऑडीट अहवाल आनी कागदपत्रांची पळोवणी केल्या उपरांत फुडलो निर्णय जातलो, अशें मुख्यमंत्र्यांनी स्पश्ट केलां. हाचे उपरांत सोसायटीचे गोंयचे प्रतिनिधी, संचालक तशेंच अधिकाऱ्यांनी सहकार निबंधकांची भेट घेवन कागदपत्रां सादर केल्यात. तांणी पत्र बरोवन माफी मागल्या, अशी म्हायती सहकार निबंधक आशुतोष आपटे हांणी दिली.
तिरुमला तिरुपती सोसायटीक गोंयांत 13 जाग्यांचेर फांटे सुरू करपा खातीर दिल्ली एनओसी रद्द करपाचो आदेश मंगळारा जारी जालो. ह्या आदेशा उपरांत गोंयांतल्या सहकार वाठारांत खवदळ निर्माण जालो.
फाटले तीन दीस फांट्यांत कर्मचाऱ्यां कडेन सोसायटी विशी चवकशी करतना खूब जाण विड्रॉवल स्लिपी भरतना दिसतात. तिरुमला तिरुपती सोसायटीक 2023, 2024 आनी 2025 वर्सा नोटिसो जारी केल्यो. हे नोटिशीक तांणी कसलोच प्रतिसाद दिवंक ना. सोसायटीन ऑडीट अहवाल लेगीत सादर करूंक ना. हाका लागून एनओसी रद्द करपाचो निर्णय सरकारान घेतलो. सोसायटीन ऑडीट अहवाल आनी हेर कागदपत्रां सादर केले उपरांत अर्थीक स्थितीची म्हायती सरकाराक मेळटली. सहकार निबंधक कार्यालयाचे अधिकारी कागदपत्रां तपासपाक गेल्ले त्या वेळार लेगीत सोसायटीन सहकार्य करूंक ना. सोसायटीच्या अर्थीक स्थिती विशी सरकाराक कसलीच म्हायती ना. हाका लागून खबरदारीचो उपाय म्हूण सरकारान एनओसी रद्द करपाचो निर्णय घेतलो. एनओसी रद्द करपाचो निर्णय फाटीं घेवपाची मागणी सोसायटीच्या प्रतिनिधी मंडळान पत्रांत केल्या. ऑडीट अहवाल तशेंच कागदपत्रांची आता तपासणी जातली. हाचे उपरांत सोसायटीच्या एनओसी विशीं निर्णय जातलो
हे फुडें सोसायटी दर वर्सा ऑडिट अहवाल तशेच कागदपत्रां सादर करतली. हाचे पयलीं ज्यो चुकी जाल्यात त्यो हाचे फुडें जावच्यो नात, अशें आस्वासन सोसायटीन पत्रांत दिलां. गोंय सहकारी सोसायटी कायदो 2001 प्रमाण क्रेडीट सोसायटींक दर वर्सा ऑडीट अहवाल सादर करचो पडटा. ह्या अहवाला सयत गोंयांतले गुंतवणुकी विशीं सोसायटी कडेन म्हायती मागिल्ली. ऑडीट अहवालांत गोंया विशीं कितें म्हायती आसा, ताची तपासणी जातली. एकंदर वेव्हारा परस गोंयच्या फांट्यांचे म्हायतीचेर आमचो भर आसा. कागदपत्रांची तपासणी केले उपरांत सहरकाराक अहवाल सादर जातलो, अशी म्हायती अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
