भांगरभूंय | प्रतिनिधी
तिरुपती, खबरां संस्था : संवसारीक मान्यताय मेळिल्लें भारतांतलें (आंध्रप्रदेश) पयल्या क्रमांकाचें गिरेस्त देवूळ तिरुपती बालाजींत प्रसाद म्हूण दितात, त्या लाडवां विशींचो वाद वाडत गेला. लाडू तयार करतना वापरतात, त्या तुपांत जनावरांची चरबी आनी नुस्त्याचें तेल वापरतात, असो आरोप तेलगू देशम पक्षान करतकच देशभर खवदळ जालो. व्हायएसआर काँग्रेसीन उच्च न्यायालयांत याचिका दाखल करून ह्या आरोपाची चवकशी करपाक खास समिती नेमपाची मागणी केल्ली. आतां सर्वोच्च न्यायालयान हे याचिकेचेर निर्णय घेतला.
सर्वोच्च न्यायालयान कितें सांगलें?
ह्या प्रकरणांत नव्यान चवकशी करपाचे तें खातीर पांच वांगड्यांची समिती तयार करपाचो निर्देश सर्वोच्च न्यायालयान दिला. हांतूत दोन वांगडी सीबीआयचे, दोन वांगडी आंध्र प्रदेश पुलीसांचे आनी एक वांगडी एफएसएसआयचे आसतले अशें न्यायालयान स्पश्ट केलां. तशेंच हे चवकशेचेर सीबीआय संचालक नदर दवरतले अशेंय न्यायालयान सांगलां.
मजगतीं, हाचे आदीं राज्य सरकारान ह्या प्रकरणाची चवकशी करपा खातीर एसआयटीची थापणूक केल्ली. एसआयटीनय ह्या प्रकरणाची चवकशीय सुरू केल्ली. पूण हें विशीं सर्वोच्च न्यायालयांत याचिका दाखल जाल्ल्यान चवकशी तात्पुरती स्थगीत दवरली. आंध्र प्रदेशाचे डीजीपी द्वारका तिरुमाला राव हांणी हे संबंदी म्हायती दिल्ली. पूण आतां सर्वोच्च न्यायालयाच्या निर्देशा प्रमाण पांच वांगड्यांची समिती ह्या प्रकरणाची चवकशी करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
