तिरुपती लाडू वाद : केंद्रान मागलो अहवाल
भांगरभूंय | प्रतिनिधी
व्हायएसआर पक्ष न्यायालयांत, चवकशी करपाची सगल्यांचीच मागणी
तिरुपती, खबरां संस्था : संवसारीक मान्यताय मेळिल्लें भारतांतलें (आंध्रप्रदेश) पयल्या क्रमांकाचें गिरेस्त देवूळ तिरुपती बालाजींत प्रसाद म्हूण दितात, त्या लाडवां विशींचो वाद वाडत आसा. लाडू तयार करतना जनावरांची चरबी आनी नुस्त्याचें तेल वापरतात, असो आरोप तेलगू देशम पक्षान करतकच देशभर खवदळ जालो. व्हायएसआर काँग्रेसीन उच्च न्यायालयांत याचिका करून ह्या आरोपाची चवकशी करपाक खास समिती नेमपाची मागणी केल्या. ताचेर २५ डिसेंबराक सुनावणी जातली. मजगतीं, विश्व हिंदू परिशदेंत ह्या प्रकाराची तटस्थपणान चवकशी करची अशी मागणी केल्या.
केंद्रान मागलो अहवाल
तेलगू देसम पक्षान केल्ल्या आरोपा संबंदी पुराय अहवाल सादर करचो असो आदेश केंद्र सरकारान आंध्र प्रदेश सरकाराक दिला. केंद्रीय भलायकी मंत्री जे. पी. नड्डा हांणी ते विशीं मुख्यमंत्री चंद्र बाबू नायडू हांचे कडेन भासाभास केली.
चार दिसां पयलीं फाटल्या पांच वर्सांच्या काळांत जगन मोहन सरकारान आनी व्हायएसआर काँग्रेस पक्षान तिरुमालाची पवित्रताय मातये भरवण केली असो आरोप तेलगू देसमाचे मुखेली आनी आंध्र प्रदेशाचे मुख्यमंत्री चंद्रबाबू नायडू हांणी केल्लो. काल तांणी लाडवांत बैल, दुकराची चरबी आनी नुस्त्याचें तेल आसता अशें सांगून गुजरातांतले प्रयोगशाळेचो हवालो दिल्लो. हे प्रकार आदल्या सरकाराच्या काळांत जाताले. मात आमी सत्तेर येतकच ते बंद केले, अशें नायडू हांणी सांगलें. हो अहवाल १७ जुलयाचो आसा.
दिसाक साडेतीन लाख लाडू
तिरुपतीच्या ३०० वर्सां आदल्या रांदचे कुडींत सद्दां साडेतीन लाख लाडू करतात. तिरुमाला ट्रस्टाक प्रसाद वाटून वर्साक ५०० कोटी रुपया मेळटात. म्हयन्याक सादारण १४०० टन तूप लागता. हे लाडू सद्दां २०० ब्राह्मण दादले, बायलो मेळून तयार करतात. राम मंदिराचे प्राण प्रतिश्ठे वेळार हांगाच्यान १ लाख लाडू भेट म्हूण धाडिल्ले. तिरुमाला देवळाची वर्साक सादारण ३००० कोटी रुपया जोड आसा. तातूंतले १५०० कोटी रुपया दाना वरवीं मेळटात.
भावना दुखावल्यो
ह्या प्रकाराक लागून हिंदूंच्यो भावना दुखावल्यात. तेन्ना ह्या आरोपांची तटस्थपणान चवकशी जावची अशी मागणी विश्व हिंदू परिशदेन केल्या. ह्या प्रकाराक लागून समेस्त हिंदुंक धक्को बसला. हिंदू धर्माचेर परत परत हल्ले जायत आसात. हाचे मुखार आमी हे सोंसून घेवचे नात, अशें विश्व हिंदू परिशदेचे सरचिटणीस लाल बागरा हांणी सांगलें.
देवळान नेमली चवकशी समिती
तिरुपतीच्या प्रसादांत सोयाबीन, नाल्ल, सनफ्लाॅवर, कापसाच्यो बियो, तेल मेळ्ळां. हें चलता. पूण नुस्त्याचें तेल, बीफ टॅलो (चरबी मंद उज्याचेर शिजयतकच जावपी तूप) आनी लार्डाचे अंश (दुकराची चरबी पसून तयार करतात.) सांपडल्यात. ताका लागून वाद जाला. गुजरातांतले राष्ट्रीय डेरी उदरगत मंडळाचे प्रयोगशाळेन केल्ले तपासणेंत हे अंश तुपांत सांपडल्यात. तें लाडू करपाक वापरतात.
आरोप- प्रत्यारोप
देवस्थानाचे आदले चॅरमन आनी व्हायएसआर काँग्रेसीचे खासदार सुब्बा रेड्डी हांणी नायडू हांचें विधान हिंदूंचो अपमान करपी आसा अशें म्हणलां. तांणी केल्ले आरोप फटीचे आसात. २०१९ ते २०२४ मेरेन उच्च दर्जाचें सामान वापरून लाडू केल्यात, अशेंय तांणी सांगलें.
तेलंगणचे भाजपाचे आमदार टी राजा हांणी हो आमचे संस्कृती आनी धर्माचेर हल्लो. आमी तो सोंसून घेवचे नात अशें म्हणलां. तर रामजन्मभूमीचे मुख्य पुजारी आचार्य सत्येंद्र दास हांणी हो एक कट आसा. सनातन धर्माचेर हल्लो आसा, अशी प्रतिक्रिया दिल्या.
मजगतीं, कांय जाणांक हो राजकी डावपेचांचो, शह- काटशहाचो एक भाग अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
