भांगरभूंय | प्रतिनिधी
तिरुपती, खबरां संस्था: तिरुमाला तिरुपती देवळांत काम करपी कर्मचारी हिंदू आसूंक जाय अशें देवळाचे नवे नेमिल्ले अध्यक्ष बी. आर. नायडू हांणी पत्रकार परिशदेंत सांगलें. हाचे सयत बिगर हिंदू कर्मचाऱ्यांची हेर सरकारी खात्यांत बदली करपा विशीं वा तांकां स्वयंसेवी निवृत्ती (व्हीआरएस) दिवपा विशीं आंध्र प्रदेशाच्या मुख्यमंत्र्या कडेन चर्चा करतले अशेंय तांणी सांगलें.
देवळांत सगळेच कर्मचारी हिंदू नेमपाचो हो पयलोच यत्न. हांतूत आडमेळीं लेगीत आसात. दर एका मुद्द्याचो विचार करचो पडटलो. देवळाची पवित्रताय तिगोवन दवरची पडटली. वेंकटेश्वर स्वामीचो भक्त आशिल्ल्यान मंडळाचो अध्यक्ष म्हूण नेमणूक जावप म्हळ्यार एक विशेश अधिकार आसा. प्रामाणीकपणान आनी पारदर्शकतायेन आपूण आपलें कर्तव्य पाळटलों, अशेंय नायडू सांगलें.
२४ वांगड्यांची समिती
आंध्र प्रदेश सरकारान 24 वांगड्यांची समिती स्थापन केल्या. बालाजी देवळाचें वेवस्थापन ही समिती पळयतली. हे समितीचे अध्यक्ष म्हूण बी. आर. नायडू हांची नेमणूक जाल्या. तशेंच भारत बायोटेक लिमिटेड हे कंपनीचे सहसंस्थापक आनी वेवस्थापकीय संचालक सुचित्रा एला हांचो वांगडी म्हूण समितींत आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
