भांगरभूंय | प्रतिनिधी
तिरुपति, खबरां संस्था ः तिरुपती बालाजी देवस्थानांत काल जाल्ले खेटाखेटींत स जाणांक मरण आयलां. तर ४० जाण जखमी जाल्यात. ह्या प्रकारा विशीं राष्ट्रपती द्रौपदी मुर्मू, प्रधानमंत्री नरेंद्र मोदी, विरोधी पक्ष फुडारी राहुल गांधी हांणी दुख्ख उक्तायलां. नॅशनल काॅन्फरन्साचे फुडारी फारुख अब्दुल्ला हांणी म्हणलां: आमच्या देशांत धर्माक खूब म्हत्व आसा, तेन्ना अशे प्रकारच्या घडणुको जावच्यो न्हय म्हूण पयलींच उपाय घेवपाक जाय.
आयज बिरेस्तारा सकाळीं तिरुपती देवळांत वैकुंठ एकादशी द्वार दर्शना खातीर कुपनां वांटपाक सुरवात जाल्या. ते खातीर बुधवारा सांजवेळा सावन हजारांनी भक्तांची गर्दी जाल्ली. उपरांत खेटाखेटीची परिस्थिती निर्माण जाली आनी 6 जाणांक चिड्डून मरण आयलें. जाल्यार 40 परस चड जाण जखमी जाले. मरण आयिल्ल्यांच्या कुटुंबांक दरेकी 25 लाख रुपया दिल्यात. 1.20 लाख कुपनां वाटपाचे आशिल्ले. ते खातीर 94 कावंटर उबारल्यात.
चड म्हायती प्रमाण, कुपनां घेवपा खातीर भक्तांची लांब रांक आशिल्ली. थळावे लोक तशेंच हेर वाठारांतले भक्त व्हड प्रमाणांत कावंटरा मेरेन पावले. अचकीत विष्णु धामाच्या कावंटराचेर झगडीं जालीं. ताका लागून लोक भियेवन पळून वचपाक लागले आनी ह्या वेळार खेटाखेटाची परिस्थिती निर्माण जाली. हांतूत स जाणांक मरण आयलें.
हे घडणुके उपरांत जखमी जाल्ल्या 40 लोकां मदल्या 28 जाणांक रुईया हॉस्पिटलांत आनी 12 जाणांक सिम्स हॉस्पिटलांत व्हेले, तातूंतल्या स जाणांक मरण आयलें. तातूंत 5 बायलो आनी 1 दादलो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
