भांगरभूंय | प्रतिनिधी
राजकी फुडारी मेळत थंय लुडबूड करीत आसतात. स्वता ना जाल्यार आपल्या घरच्यांक, सोयऱ्यांक, इश्टांक, वावुरप्यांक मुखार करीत आसतात. ताचे सदांच बरे परिणाम जातात, अशें ना. खास करून आमच्या खेळां संघटणांचो नियाळ घेतल्यार हें होलमतलें. भारतीय कुस्ती म्हासंघाचे आदले अध्यक्ष, खासदार ब्रिजभूषण शरण सिंह हांचेर तर आॅलिंपिकांत भांगरा पदक मेळोवपी खेळगड्यांचो लिंगीक छळ केल्ल्याचो आरोप जाल्लो. गोंया सयत खंयच्याय राज्यांतल्या खेळां संघटणांचो अभ्यास करात, ताचेर राजकी आशिर्वाद मेळिल्ले एक- दोग जाण तरी आसतलेच…. आनी त्या संघटणांचेर पार्शिलीटी वा अर्थीक गैरवेव्हार असले आरोप वर्सांतल्यान एक फावट तरी जाल्ले पळोवंक, वाचूंक मेळटले. आतां युनायटेड वर्ल्ड रेसलींग संघटणेन (यूडब्ल्यूडब्ल्यू) भारतीय कुस्ती म्हासंघाचें वांगडीपद निलंबीत केलां. वेंचणूक घेवंक ना म्हूण ही कारवाय जाल्या. हो भारतीय पेलवानां खातीर व्हडलो धपको. कारण 16 सप्टेंबरा सावन सुरू जावपी संवसारीक कुस्ती वस्तादपण सर्तींत आमच्या कुस्ती संघाक तटस्थ बावट्या खाला खेळचें पडटलें. भारतीय तिरंगो थंय आसचो ना. लजेची गजाल ही. लाखांनी भारतीयांक तिरंगो जिवा परस मोलाचो. हालींच जाल्ल्या स्वतंत्रताय दीस सुवाळ्या वेळार आमी तें पळयलां, अणभवलां. मात, फुडलो म्हयनोभर तरी ‘शान न इसकी जाने पाये, चाहें जान भले ही जाये’ म्हणटात त्या बावट्याक आमच्या पेलवानांक मुकचें पडटलें. हाका कोण जापसालदार?
ब्रिजभूषण सिंह ‘शरण’ आयिल्ले जाल्यार येन्ना वेंचणूक जावन सगलें जाग्यार पडपाचें. मात तांणी वयरसून आदेश येता म्हणसर कदेलाक मारिल्ली वेंग सोडली ना. लिंगीक छळाचो आरोप जाल्लो, तेन्नाच पदाचो राजिनामो दिवपाचो. पूण ते खातीर साक्षी मलीक, विनेश फोगाट, संगीता फोगाट, बजरंग पुनिया ह्या पेलवानांक म्हयनोभर आंदोलन, उपास करचो पडलो. सोशल मिडियाचेर आंदोलकांचेर सकयल्या पांवड्या वयली टिका जावंक लागली. अखेरेक प्रकरण हाता भायर वचपाचीं चिन्नां दिसतकूच ब्रिजभूषण हांकां पद सोडपाचो आदेश आयलो. यूडब्ल्यूडब्ल्यून 30 मे दिसा भारतीय कुस्ती म्हासंघाक पत्र बरयिल्लें. 15 जुलया मेरेन म्हासंघाची वेंचणूक घेवची!! ती घेवपाचें थारलें 12 आॅगस्टाक. पूण आदलेच दीस हरियाणा कुस्ती असोसिएशनाचे (एचडब्ल्यूए) याचिकेचेर पंजाब- हरियाणा उच्च न्यायालयान वेंचणुकेक 28 आॅगस्ट मेरेन स्थगिती दिली. आमी भारतीय कुस्ती म्हासंघ आनी हरियाणा आॅलिंपीक असोसिएशना कडेन संलग्न आसतनाय आमचे बदला दुसरे एक संघटणेक वेंचणुकेंत भाग घेवपाक परवानगी दिल्या, असो एचडब्ल्यूएचो दावो. काँग्रेसीचे खासदार दीपेंद्र हुडा तिचे अध्यक्ष. तांचेरूच बायलां पेलवानांक आंदोलन करपाक प्रवृत्त केल्ल्याचो आरोप ब्रिजभूषणान केल्लो. म्हासंघाचें निलंबन वेंचणुके उपरांत घडये रद्द जावं येता. तशें जालें जाल्यारूच संवसारीक कुस्ती वस्तादपण सर्तींत आमच्या पेलवानांक तिरंग्याक मानवंदना दिवपाक मेळटली.
भारतीय कुस्ती म्हासंघाचे वेंचणुकेंत अध्यक्षपदा खातीर संजय सिंह आनी अनिता शेओरान (2010 च्या राष्ट्रकुल खेळां सर्तींतली जैतिवंत पेलवान) उबी आसा. अनिता ही आंदोलक पेलवानांची खर समर्थक, तर संजय हे ब्रिजभूषण हांकां सामके लागींचे मानतात. कोणूय जिखूं, पूण परत ब्रिजभूषणा सारक्या फुडाऱ्याक हांगा हात- बोट घालपाक मेळूंक जायना. तांकांच न्हय, तर सगल्याच फुडाऱ्यांक आनी तांच्या सोयऱ्यांक ह्या म्हासंघा पसून पयस दवरप कुस्तीचे उदरगती खातीर बऱ्याचें.
कांय म्हयन्यां पयलीं फक्त राष्ट्रीय पांवड्यार खेळिल्ल्या खेळगड्यांकूच खेळां समित्यांचेर घेवपाचो निर्णय सरकारान घेतिल्लो. धांवपटू पी. टी. उषा हांचे आॅलिंपीक संघटणे वयले नेमणुकेन तो चालिकूय लागिल्लो. मागीर हेर संघटणांक तो कित्याक बांदील ना? राजकी साहित्य मळाचेर ‘मोदी है तो मुमकीन है’ अशें एक लोकप्रीय वाक्य आसा. तेन्ना प्रधानमंत्री मोदी हांणी खेळां संघटणा बेगोबेग नितळ, निवळ करूंक फावो… आनी मनांत हाडीत जाल्यार रातीं भितर तांकां तें करप शक्य आसा. राष्ट्रीय पांवड्यार खेळिल्ल्या चडांत चड खेळगड्यांकूच खेळां समित्यांचेर जागो मेळटलो. तांणी आनी हेर वांगड्यांनी समिती सोडी मेरेन खंयच्याच राजकी पक्षा कडेन संबंद दवरप ना, अशीं बंधनां घालपाक जाय.
भारतीय कुस्ती म्हासंघाचें निलंबन करपाची ताकतीक युनायटेड वर्ल्ड रेसलींग संघटणेन करूंक जायनाशिल्ली. वेंचणुके मेरेन रावंक जाय आशिल्लें. 15 सप्टेंबरा पयलीं हें निलंबीत रद्द जातलें आनी आमचे पेलवान पदकां घेतना हड्डें मुखार काडून ताठ मानेन तिरंग्याक सलामी दितले, अशी आस्त. हो अभिमानाचो देखाव पळोवपाक 140 कोटी भारतीय उमळशीकेन रावल्यात, हें संवसारीक कुस्ती संघटणेन विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
