भांगरभूंय | प्रतिनिधी
मानादीक सर्वोच्च न्यायालयान 23 जानेवारी 2004 ह्या दिसा सविधानाच्या कलम 19 (1) अ प्रमाण राष्ट्रीय झेंडो उबारप हो दरेक भारतीय नागरिकांचो मुळावो हक्क असो निकाल दिलो. झेंडो दर भारतीय नागरिकांच्या घराच्या अस्मितायेचो वांटेकार जावंचो, फक्त सरकारी इमारतींनी दिसपी प्रतीक उरूं नज, ही त्या निकाला फाटली भावना आसूं येता.
2022 हें वर्स येता म्हणसर भारत देशान स्वतंत्रतायेची 75 वर्सां पुराय केल्लीं. त्याच निमतान सरकारान “आझादी का अमृत महोत्सव” देशभर मनोवपाचे थारायलें. “हर घर तिरंगा” चो नारो दीत मोठ्या उमेदीन सगळ्यां नागरिकांनी लेगीत त्या सुवाळ्यांक तेंको दिलो. देशाचो राष्ट्रीय झेंडो घरा घरांनी दिसूंक लागलो.
चालू हें वर्स अठ्यात्तरावें. पावसाचे दीस आसून लेगीत बावटो हातांत घेवन तिरंगा यात्रेची मिरवणूक देश भक्तांनी भिजत, मोटरसायकली वेल्यान शारभर भोंवडायली. इलेसावां लागीं आसतात, तेन्ना तर शारांत राष्ट्रीय सुवाळो मनोवपाची उमेद दिसान दीस वाडत वता, हें तांणी जुस्त हेरलें. देशभक्तीचें “रीळ” करताना प्लास्टीक रिफ्लेक्ट जाता. सेल्फी आनी स्टेटस फोनार अपलोड केल्या उपरांत बरो दिसना. देशभक्ताची कागाळ लक्षांत घेवन, ह्या फावट खोपींतल्या कारखान्यांत तांणी कापडी बावटे तयार केल्ले. पर्यावरण- बिर्यावरण तांच्या राज्याक लेगीत नाशिल्लें. बदलत वचपी पर्यावरण, वातावरण आनी हवामान हीं बऱ्याची कांय वायटाचीं लक्षणां, हें कोणाकूच पडूंक नाशिल्लें. कसलोय सुवळो आनी त्या दिसाचो फायदो घेवन केल्ली जोड फक्त हें एक उद्दीट.
पंदरा ऑगस्टाच्या आदल्या रातीं पावसान धुमशेणां घाली. उटंगार पडपी पावसान कारखान्या सयत सगळ्या खोपींक गळटी लागली. पुराय झोपडपट्टी पावसाच्या झडीन भायर भितर भिजून गेल्ली. त्या रातीं कोणाकूच सारखी न्हीद लेगीत लागली ना. सकाळ
जातना पावसान मात्सो आसोर केलो. भायर भुरग्यांचो बोवाळ चलिल्लो. ती सगळीं
फामिली वांगडा आपणाल्या खोपीं सामकार चिप्प भिजिल्ले बावटे सुकयतालीं. तिरंगी रंगाच्या उपाट मोगान भरिल्ल्या हर घर तिरंगा मोगीक तें विकूंक जाय आशिल्ले. वांगडा एक दिसाच्या देश भक्तीन बुडिल्ल्या गिरायकांच्या भक्तीक वोतो येवच्या आदीं खापोवपाचे आशिल्ले! !!
दादा हेगडे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
