भांगरभूंय | प्रतिनिधी
‘आय अॅम सॉरी’ तियात्राची काणी कित्याचेर आदारून आसा?
ही काणी दोगा मोग्यांचीं, जीं एकामेकाचेर खूब मोग करतात. मात, चलयेच्या घरच्यांच्या विरोधाक लागून काजार जावपाक शकनात. हे गजालीक तें चली आपल्या मोग्याक जापसालदार धरता, कित्याक तर तो ताचे फामिले कडेन येवन ताचो ‘हात’ मागूंक अपेशी थारता. ते चलयेचें काजार दुसऱ्या कडेन जाता आनी मुखार तांचे जिणेंत येवपी आव्हानां हाचेर हें तियात्र आदारून आसा. तें लोकांक आवडटलें अशी म्हाका आस्त आसा.
एक बरें तियात्र बरयतलो जाल्यार विशयाचेर संशोधन करपाक पडटा?
पयलीं म्हुणल्यार तियात्रूच न्हय तर खंयचेंय साहित्य बरे तरेन बरयतलो आनी ताचो आनंद लोकांक दितलो जाल्यार लेखकाक पयलीं वाचन आसपाक जाय. वाचन केल्यार बऱ्यो- बऱ्यो संकल्पना तकलेंत येतात. एकदां काणी तकलेंत आयली म्हुणटकच ताचेर बरो अभ्यास करून आपूण ती लोकां मुखार कसो दवरतलो आनी काणी मुखार कशी व्हरतलो हाचेर भर दिवपाची गरज आसता. हांव फाटलीं साबार वर्सां गोंयच्या दिसाळ्यांनी आनी मासिकांनी बरयतां. म्हाका बरोवपाकूय आवडटा आनी वाचपाकूय हे खातीर हांव म्हज्या तियात्रांक न्याय दिवंक शकतां अशें म्हाका दिसता.
तुमचें हें कितल्यावें तियात्र?
हें म्हजें धावें तियात्र. हीं धावूय तियात्रां हांवें बरयल्यांत आनी दिग्दर्शीत केल्यांत. सुरवेक हांवें दिग्दर्शना खातीर संदीप कळंगुटकर हाची मजत घेतली. पूण आतां हांवूंच करतां. म्हाका हें काम करतना खूब खोस भोगता.
दरेक तियात्राची काणी वेगळी आनी संकल्पना वेगळी करप सोपें आसता?
हांवें सांगलां तें प्रमाणें, वाचन आसल्यार हें सगळें सहज जाता. म्हाका वाचनाची खूब आवड आसा. हांव उमेदीन वाचतां आनी बरयतांय. ते खातीर वेगवेगळ्यो काणी आनी संकल्पना सहज येतात.
तुमी ह्या तियात्रांत फाटल्या पड्ड्याच्या जाग्यार ‘स्क्रीन’ लावपाचो प्रयोग केला, अशें करपी तुमी पयलेच तियात्रिस्त?
हेरांनी कोणें केलां जाल्यार म्हाका खबर ना. पूण हातूंतल्यान लोकांक एक वेगळेंपण दिवपाचेर म्हजो भर आसा. तियात्रांत जर फाटल्यो कांय घडणुको दाखोवपाक जाय जाल्यार त्यो स्क्रीनीचेर दाखोवं येतात. म्हज्या ह्या तियात्रांत अशें एक दृश्य आसा जंय म्हाका हीं दोगांय मोगी आदीं कशीं एकामेका वांगडा भोंवतालीं तें दाखोवपाचें आसा आनी तें हांव ह्या स्क्रीनीचेर दाखयतां. हातूंतल्यान लोकांक फाटली काणी कळटा आनी तियात्राक उठाव येता.
तुमच्या तियात्रांत आनी हेर तियात्रांनी हिंदू कलाकार काम करतात, हे खातीर तियात्र हो धर्मनिरपेक्ष जाला अशें म्हणूं येता?
आतांच न्हय, तर तियात्र हो आदीं सावन सॅक्युलर आसा. आदीं प्रेमानंद लोटलीकारा सारक्या कलाकारान तियात्र गाजयला आनी आतां प्रदीप नायक, राजदीप नायक, अनिल पेडणेकार हे तियात्रां गाजयतात. कलाकारूच कित्याक, तियात्र पळोवपाक आमचे हिंदू भाव- भयणीय येतात. हे खातीर हांव तर म्हुणटलो तियात्र हो खरोच सॅक्युलर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
