भांगरभूंय | प्रतिनिधी
‘बारा बिरेस्तार तेरा शुक्रार’ दुसरो, ‘फॅमिली’ तिसरो
भांगरभूंय । खबरां मेज
पणजीः कला अकादमीचे ‘अ’ गट तियात्र सर्तींत कांदोळेंच्या गोवा.कॉम सोसियो आनी कल्चरल असोसिएशनान सादर केल्ल्या ‘डॅडीस होम’ तियात्राक पयलें इमान (1 लाख रुपया) फावो जालें.
मोरजेचे माची मोगी मोरजी कल्चरल सांस्कृतीक संस्थेन सादर केल्ल्या ‘बारा बिरेस्तार तेरा शुक्रार’ तियात्राक दुसरें (75 हजार रुपया) जाल्यार कळंगुटेच्या मातियास क्रिएटीव्ह ग्रुपान सादर केल्ल्या ‘फॅमिली’ तियात्राक तिसरें इमान (50 हजार रुपया) फावो जालें. कला निकेतन माजोड्डें संस्थेन सादर केल्ल्या ‘गोंयकारपण’ तियात्राक उमेद वाडोवपी इनाम (25 हजार रुपया) फावो जालें.
उत्कृश्ट अभिनय (दादले) पयलें इनाम- रुपेश जोगळे (गोंयकारपण) आनी दुसरें इनाम फा. मिल्टन रॉड्रिगीज (डॅडीस होम) हांकां फावो जालें. डेशमोंड कार्दोज (माप भरोन वोतलें), शिवानंद नायक (आय लव्ह यू), सिमोन जॉन डिसिल्वा (डॅडीस होम) हांकां प्रशस्तीपत्रकां फावो जालीं.
उत्कृश्ट अभिनय (बायलो) पयलें इनाम- लुईझा फर्नांडीस (माप भरोन वोतलें) आनी दुसरें इनाम- आयरीन कार्दोज (आय लव्ह यू) तशेंच प्रशस्ती पत्रकां स्मितल होबळे (जबाबदारी), कोलिशा डिसिल्वा (फॅमिली), आंतोनेत डिसोझा (गुन्यांव कोणाचो), सेंड्रिशा फर्नांडीस (नेम फेम आनी गेम) आनी रोमिलिया फर्नांडीस (गोंयकारपण) हांकां फावो जालीं.
उत्कृश्ट दिग्दर्शन पयलें इनाम- मायकल ग्राशियस (गोंयकारपण), दुसरें- शांताराम पवार (डॅडीस होम) आनी तिसरें- मातियास मास्कारेन्हास (फॅमिली).
ही सर्त 20 फेब्रुवारी ते 8 मार्च मेरेन चलिल्ली. तातूंत 12 तियात्र सादर जाले. आग्नेलो फर्नांडीस, फा. मथीव फर्नांडीस आनी डोरोटी जुलिएय मास्कारेन्हस हांणी सर्तीचें परिक्षण केलें. इनामां भेटवण सुवाळ्याची तारीख उपरांत कळयतले. सविस्तर निकाल कला अकादमीचे वॅबसायटीर (kalaacadenygoa.co.in) उपलब्ध आसा, अशें कला अकादमीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
