भांगरभूंय | प्रतिनिधी
हालींच एका तियात्रांत कांतोरिस्त आसेन्त लॉरेन्साचें तियात्रा विशीं एक कांतार आयकल्लें. गंभीर विशय. तो तियात्राचे विमोर्शे बरयतल्यांनी आनी तियात्र कले विशीं लेख – इतिहास बरयतल्यांनी, तशेंच कोंकणी अकादेमींनी आनी संस्थांनी, तो खूब आदीं हाताळूंक जाय आसलो. पूण हाताळ्ळो ना ! आदल्या तियात्रांची आनी प्रेक्षकांची आतांचे परिस्थिती कडेन सर करून आसेन्त म्हणटा, ‘आदीं तियात्र पळेणार लायनींत उबे रावून तिकेटी काडटाले. आनी स्पेशल बसींनी भरून राजेंद्र प्रसाद मैदानार तियात्राक येताले… आयज फुकट पासून तिकेटी दिल्यार तियात्र पळेणार तियात्रांक येनात… आदले तियात्र – पळेणार म्हणटात, आदल्या तियात्रांनी आसतालें तें जिरें – मिरें आयच्या तियात्रांनी मेळना.’
हें तियात्रिस्तांकूय जाणवलां ही बरी गजाल. जाल्यार असली पाळी तियात्रांचेर कित्या खातीर आयली ? म्हळ्यारूच आयच्या तियात्रांनी आदलें जिरें-मिरें ना. आयच्या तियात्रांनी आलें – लसूण चड काय? कोण सोदून काडटलो? हें काम कोणाचें?…
तियात्र फुडले पिळगे खातीर त्याच प्रमाणीक तियात्राच्या सारांत जिवो उरुंक जाय. ही मोख धरुन हे विशीं एक ल्हानशी विस्कावणी करपाचो यत्न करतां हांव. हो म्हजो यत्न तियात्र प्रकार राखून आनी तितल्याच प्रमाणान तो रसरशीत उरचो म्हूण आसा. तशीं हांव आस्त बाळगितां.
ही विस्कावणी करतना, पयले सुवातेर एक गजाल करतां, हें बरोवप कोणाकूच हिणसावंचे खातीर वो कोणाकूच दोशी थारावपाच्या हेतून हांव करिना. आयज गोंयचे परिस्थितीक नागरीक फकत राजकारण्यांकूच जबाबदार थारायतात, हें सारकें ना. कित्याक? ह्या गोंयच्या निसंतानाक राजकारण्यां इतले न्हय जाल्यार कमी प्रमाणान तरी नागरीक जबाबदार आसात. तेच परीं तियात्रांची परिस्थिती हे वायट दशेर पावंक तियात्रिस्तूच न्हय जाल्यार तितल्याच वा चड प्रमाणान तियात्र –पळेणारोय जबाबदार थारतात. हें हांव थीरपणान मांडटां.
आयच्या तियात्राची जाल्ली दशा तपासतलों जाल्यार पयले सुवातेर गोंयच्या हेर संस्कृतीक प्रकारांची जाण आसची गरज भासता. गोंयच्या संस्कृतीक मळार विविध दिर्वितीमेन्ताचे (मनरिजवण) प्रकार लोकांचे मदीं चलताले. जशे परीं जागोर, जात्रां, नाटक, फुगडी, कांतत्रादांस, कंसर्ट, मांडो- दुल्पदां, लोक नाच, जमनी वेलो फेळ, लोकां-खेळ, तियात्र, नोन-स्टोप ड्रामा, तमासो, संगीत ओपेरा आदीं. हांचें दरेकल्यांचें आंग विविध आनी तें आंग एकाचें दुस-यांत मिसळ करपूच म्हळ्यार त्या विविध प्रकाराची वाट लावप जाता. उदारणांत,- एक संगीत ओपेरा वा दाखोवन तियात्र म्हण माचयेर हाडप योग्य ना. तेच परी कन्सर्ट तियात्र जावं नज. ताका मागीर कितलोय बरो सायड- शो (कांतरां) आसूं. एका खेळा तियात्रां मदले कांत तातूंत कांतारां भरशिलीं म्हणून तो खेळ तियात्र आसलोलो तियात्र प्रकार करूं नज. लोकांक हांसोवपाक आनी उमेदीर दवरुंक सुरू तो शेवट पासून प्रेक्षकांचें मनोरंजन करपी एक तमासो तियात्र म्हणूंक जायना. दर एक प्रकार वेगळो, विविध आनी तातूंत तियात्र म्हळ्यार एक आगळो – वेगळो गोंयकारांचो संस्कृतीक प्रकार असलो अख्या संवसारांत दुसरो आसूं नज.
(मुखार चलता..)
लिप्यांतर: विशाल खांडेपारकार, 8080622370
फाऊस्तो वि दा कोस्ता
9821228684
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
