भांगरभूंय | प्रतिनिधी
अँथनी बार्बोझा: मडगांवां अखील गोंय आंतरशालेय तियात्र सर्तीची सुरवात
मडगांव: तियात्रिस्तांनी कोंकणी भास सांबाळ्ळ्या. आतां शाळेंतल्या भुरयांक नवी माची मेळावन दिल्या. तियात्राक लागून कोंकणी भास एके पिळगे कडल्यान फुडले पिळगे कडेन दितात. भुरग्यां मदीं तियात्राचे गूण आसल्यार पालकांनीय तांकां प्रोत्साहन दिवपाची गरज आसा अशें समाजीक कार्यकर्ते अँथनी बार्बोझा हांणी सांगलें.
तियात्र अकादमी गोंय आनी रवींद्र भवन मडगांव हांच्या जोड पालवान पयल्या अखील गोंय आंतरशालेय तियात्र सर्तीचें उक्तावण रवींद्र भवन सभाघरांत जालें. ह्या वेळार सांता क्रुझचे आमदार रुडोल्फ फर्नांडीस हांचे सयत तियात्र अकादमीचे अध्यक्ष मिनीन दी बांदार, अँथनी बार्बोझा, रवींद्र भवनाचे अध्यक्ष राजेंद्र तालक बी मानेस्त हाजीर आशिल्ले.
गोंयांत कांय बऱ्यो, वायट गजाली जायत आसतात त्यो तियात्रांतल्यान लोकां मुखार मांडटात. तियात्रांक लागून कोंकणी भास तिगून आसा. देशा भायले गोंयकार तियात्रिस्तांक देशा भायर वचपाची संद दीत आसात. तियात्रिस्तांक चडांत चड बऱ्यो सेवा मेळच्यो हे खातीर सरकारान तियात्रिस्तांक सबसिडी वा निधी वरवीं मजत करची अशी मागणी केली.
तियात्र ही कला आसून ताचेर वेवसायीक नदरेन तियात्र केल्यार फुडारांत मुखार वचपाची संद आसा. भुरग्यां मदीं कला आसल्यार ताका प्रोत्साहन दिवचें. भुरग्यांनीय आपली कला सादर करपाचेर लक्ष दिवपाची गरज आसा. इनाम मेळ्ळें ना जाल्यार लेगीत फुडले फावटी बरें सादरीकरण करपा खातीर यत्न करचो अशें रवींद्र भवनाचे अध्यक्ष राजेंद्र तालक हांणी सांगलें.
चित्रिकरणा खातीर सरकारान मजत करची: रुडोल्फ
हाचे पयलीं तियात्रिस्तांक चड सुविधा मेळनाशिल्ल्यो. आतां समाज माध्यमांच्या वापरांतल्यान तियात्रिस्त प्रसिद्धी मेळयतात. गोंय सरकारान तियात्रिस्तांक चित्रिकरणा खातीर गरजेचें सहकार्य करचें. सरकारा कडल्यान निधी मेळत जाल्यार तियात्र देशभर आनी देशा भायर लेगीत प्रसिद्धी मेळोवंक शकता आनी हातूंतल्यान कोंकणी भास संवसारभर पावतली अशें मत सांता क्रुझचे आमदार रुडोल्फ फर्नांडीस हांणी उकतायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
