भांगरभूंय | प्रतिनिधी
कार्यकर्त्यांच्या मेळाव्यांत सुदिन ढवळीकार हांचें सांगणें
फोंडें: जिल्हो पंचायत वेंचणुके वेळार युतीची उलोवणी जायत आसतना आमकां उण्यांत उण्यो स सुवातो तरी मेळच्यो अशी आमची इत्सा आशिल्ली. पूण ज्यो तीन सुवातो मेळ्ळ्यो ताचेर आमी समाधान उक्तायलें. त्यो तिनूय सुवातो विक्रमी मतांनी वेंचून हाडल्यो आनी शंबर टक्के येस मेळयलें. जर स सुवातो मेळिल्ल्यो जाल्यार लेगीत आमी स सुवातांचेरूय जैत मेळोवपाचे असो विस्वास वीज मंत्री सुदिन ढवळीकार हांणी उक्तायलो.
जिल्हो पंचायत वेंचणुकेच्या जैताचे फाटभुंयेर मगो कार्यकर्त्यां खातीर कृतज्ञता सुवाळो आयोजीत केल्लो. त्या वेळार ढवळीकार उलयताले.
ह्या वेळार माचयेर मगो प्रदेशाध्यक्ष आनी आदले मंत्री दीपक ढवळीकार, मडकय मतदारसंघातल्या सगल्या पंचायतीचे सरपंच, केरीचे सरपंच, मगो कार्यकारणीचे कांय वांगडी माचयेर हाजीर आशिल्ले.
तांणी मुखार उलयतना म्हणलें, पक्ष संघटणा चलोवप हें तितलें सोंपें काम न्हय. पूण कार्यकर्त्यांच्या योगदानाचेर पक्ष ताठ मानेन उबो आसा. कांय वर्सां पयलीं आमकां हेर पक्षा प्रमाणूच देणग्यो मेळटाल्यो. पूण आयज आमकां देणग्यो मेळनात. तरी लेगीत निसुवार्थी कार्यकर्त्यांचे फाटबळ आमचे कडेन आसा आनी ताचेरूच आमी आयज मुखार वचत आसात.
मगो पक्षाच्या कार्यकर्त्यांक पयशाची हाव ना. पक्ष श्रेश्ठीची भावना दवरून कार्यकर्त्यांनी व्हड कश्ट घेवन हे वेंचणुकेंत काम केलें. म्हणूनच दक्षीण गोंयांत सगल्यांत चड मतां मगोक मेळ्ळीं, आनी दक्षीण गोंयांतलें सगल्यांत चड मताधिक्य लेगीत मगो पक्षाक मेळ्ळें. पयशांचें दिवप घेवप करून पक्ष मोटो जायना जाल्यार लोकांची कामां करूनच पक्ष मोटो जायत आसता हें तत्व आमी पाळत आयल्यात. हे वेंचणुकेंत आमच्या कांय कार्यकर्त्यां मदले मतभेद उक्तें जाल्यात, ताचेर आमी रोखडेच उपाय काडटले. तशेंच जंय आमकां कमी मतां मेळ्ळी थंयच्या मतां मदीं वाड करपा खातीर यत्न करतले. पूण ते खातीर कार्यकर्त्यांचें सहकार्य गरजेचें आसा अशें सुदिन ढवळीकार हांणी म्हणलें.
मजगतीं, जिल्हो पंचायत वेंचणुकेंत वेंचून आयिल्ले गणपत नायक, आदिती गावडे आनी अपक्ष वेंचून आयिल्ले सुनील जल्मी हांचो ह्या वेळार सुदिन ढवळीकार हांचे हस्तुकीं भोवमान केलो.
हे वेंचणुकेंत आमी युतीच्या धर्माक पाळो दिलो. पूण भाजपाच्या ‘त्या’ आमदारा बराबर आमी रावचे नात हाची सुचोवणी आमी संबंदीत फुडाऱ्यांक दिल्ली. कारण त्या आमदारान मगो पक्षाच्या शिंव निशाणेक गाळी संविल्ल्यो. मगो पक्षाची शिंव निशाणी ही साक्षांत दुर्गा आनी महालसा मातेचें वाहन आसा. शिंवाचो अपमान हो अप्रत्यक्ष त्या देवदेवतांचो लेगीत अपमान आसा. मगो पक्षा विशीं तो अपशब्द उलयिल्लो हें आमी विसरूंक नात आनी केन्नाच विसरचे नात अशें सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
