भांगरभूंय | प्रतिनिधी
कोची : केरळांत घडिल्ले एके घडणुकेची देशभरांत सोशल मिडियाचेर चर्चा चालू आसा. गर्देन भरिल्ले बसींत एका तरणाट्यान आपल्याक लैंगीक हेतान स्पर्श केलो असो दावो करपी व्हीडिओ तरणाटेन सोशल मिडियाचेर पोस्ट केलो. उपरांत तो व्हायरल जालो. हे घडणुकेच्या दोन दिसांनीच त्या तरणाट्यान आत्महत्या केली.
तरणाटेन व्हिडियो पोस्ट केले उपरांत आपलो अपमान केल्ल्याचें दिशिल्ल्यान तरणाट्यान आत्महत्त्या केल्ल्याचो आरोप ताच्या कुटुंबान केला. त्या आरोपा उपरांत संबंदीत बायलेचेर आत्महत्त्येक प्रवृत्त करपाची कागाळ दाखल केल्या. सध्या ती तरणाटी फरारी आसा. पुलीस तिचो सोद घेतात. तिणें आपले सगले सोशल मिडिया अकावंटूय डिलीट केल्यात.
हे घडणुकेवेल्यान सोशल मिडियाचेर तरणाट्यां वटेन तशेंच आड दोनूय वटेन प्रतिक्रिया उक्तायतना दिसतात.
ह्या प्रकरणाची चवकशी केरळच्या उत्तर विभागाच्या उप-पुलीस महानिरीक्षकां कडेन दिवची अशे आदेश राज्य मानवी हक्क आयोगान दिल्यात.
मरण आयिल्ल्या दीपकाच्या इश्टांनी सांगलें, ताचें कांय वर्सां आदीं लग्न जाल्लें आनी ताचे उपरांत घटस्फोट जाल्लो. ताचे आड ह्यान पयलीं अशे तरेच्यो कागाळी नाशिल्ल्यो.
नेमकें कितें घडलें?
४१ वर्सां पिरायेचो दीपक हो केरळांतल्या कोझिकोडच्या गोविंदापूरम भागांत रावतालो. तो एका खाजगी कपड्यांचे कंपनींत मार्केटिंग विभागांत काम करतालो. थंयच्या कर्मचाऱ्यांनी दिल्ले म्हायती प्रमाण, तो सामको प्रामाणीक कर्मचारी आशिल्लो. ताचे आड कार्यालयांतल्या बायलांची केन्नाच एकूय कागाळ येवंक नाशिल्ली. शुक्रारा १६ जानेवारीक दीपक कामा निमितान कन्नूर लागसार पय्यनूर हांगच्यान मट्टनूर ह्या शारांत खासगी बसीन प्रवास करतालो. गर्दी आशिल्ल्यान दीपकाच्या हाताच्या कोपराचो तिका स्पर्श जाल्ल्याचो व्हिडियो ती तरणाटी करताली. हो व्हीडिओ तरणाटेन घडणुकेच्या दुसर्या दिसा सोशल मिडियाचेर घालो आनी तो व्हायरल जालो.
शिंजिथा मुस्तफा अशें ते चलयेचें नांव. तिणें कॅप्शनांत आरोप केलो, ‘हो तरणाटो लैंगीक हेतान आपल्याक तेंकतालो’. ह्या व्हिडियोक एका दिसानूच लाखांनी व्हिव्ज मेळ्ळे. हो व्हिडियो पळोवपी खुबश्या जाणांनी दीपकाचेर टिका केली. फुडल्या दिसा म्हणल्यार आयतारा १८ जानेवारीक ताचे कुडींत तो मरण आयिल्ले अवस्थेंत सांपडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
