भांगरभूंय | प्रतिनिधी
चेन्नय ः‘‘हांवें कुटुंबा खातीर महिला आपमजत गटा कडल्यान देड लाख रुपयांचें रीण घेतिल्लें. हांव तें फारीक करपाक शकलें ना. तेन्ना स म्हयन्यांनी एकलो म्हज्या घरा आयलो. तांणी म्हणलें – रीण कांय मिनटांनीच फारीक जातलें. फकत एक किडणी विकची पडटली. हें आयकून हांवें आनी म्हज्या घोवान किडणी विकपाची तयारी केली. त्या मनशाक आमचे परिस्थितीची पुराय म्हायती आशिल्ली. आमी सामकीं लाचार आशिल्लीं. म्हणून ४ -४ लाख रुपयांनी करार केलो. सगलीं कागदपत्रां तांणीच तयार केलीं. ५० हजार रुपया एडव्हान्सूय दिले. उपरांत एक दीस गाडी आयली आनी म्हाका पेरंबळूरच्या एका हॉस्पिटलांत व्हेलें. स दिसां उपरांत थंय डिस्चार्ज दिले. तांणी एक किडनी घेतली, मात ५० हजार रुपयां बगर कांयच दिवंक ना. उरिल्ले साडेतीन लाख रुपया आतां कोणा कडल्यान घेवं? हें म्हाका कोणूच सांगिना.’’
हें सांगतना तामिळनाडूच्या नमक्कल जिल्ह्याच्या पल्लिपलायम गांवांतली ३५ पिरायेची मल्लिका हांणी म्हणलें – ‘आतां हांव जड सामान उखलपाक शकना आनी चड वेळ उबी रावपाकूय शकना’.
पल्लिपलायमांत मल्लिका सारकिल्लेे ५ आनी नमक्कलांत वट्ट १२ पिडेस्त आसात, जांणी रिणांतल्यान भायर पडपा खातीर किडनी विकली, मात पयशे मेळूंक ना. नायलाजान तांणी पुलिसां कडेन धांव घेतली.
राष्ट्रीय रॅकेट
ह्या प्रकरणांत पांच दिसां आदीं दोगां दलालांक अटक केली. हाचे उपरांत जें कितें उक्तें जालें, तातूंत पुराय तामिळनाडूंत बोवाळ निर्माण जाला. खरें म्हणल्यार, लाचार मजुरांकडल्यान किडणी घेवपाचें हें रॅकेट तामिळनाडू वांगडा आंध्र, कर्नाटक, तेलंगणा, महाराष्ट्रांत सक्रीय आशिल्लें. हाचो मखेल सुत्रधार पल्लिपलायमच्या अण्णाई सत्यनगरचो आनंदम आसा, जो सध्या फरारी आसा. पुलिसांच्या तपासांत हेंय मुखार आयलें, ज्या लोकांनी पयलीं किडनी दिल्ली, उपरांत तेच दलाल जावन गरिबांक ४ ते ५० लाख रुपयां मेरेन दिवपाचें हांयस दाखोवन फटोवपाक लागले. दलालांनी बनावट पत्त्यांचें आधार कार्ड आनी खुबशे बनावट डोनर तयार केले. ते ह्या मजुरांक पेरंबळूर, त्रिची, सालेम आनी कोचीनच्या हॉस्पिटलांत व्हरता. दुयेंती दाखल जाले उपरांत पळून वतात. सध्या राज्य पांवड्यार चवकशी सुरू आसा. हाचो फुडल्या सप्तकांत अहवाल येतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
