तिडकीक लागून…..

भांगरभूंय | प्रतिनिधी

गोंयचे फांटभुंयेर आशिल्ल्या ‘सिंघम’ सिनेमांत अजय देवगण हाचें एक गाजिल्लें वाक्य आसा, ‘आतां माझी सटकली’. गोंयांत कोणाक केन्ना भिरभिरी मारत तें सांगपाक येना. सोऱ्याचे, ड्रग्सांचे नशेत आसल्यार मनीस तिडकता, सभावांत दोश आसल्यारूय थोड्यांची सटकता. तातूंत आनीक एके तरेचे लोक आसात. ते म्हणल्यार, गाडयेकार. मोटार जितली पॉश तितली तांची तिडक चड. सायड दिना म्हूण मारामारी जाल्ल्यो आसात. अपघात जालो काय विम्याची रक्कम मेळटा. कांय वेळार मोटार विकपीच ते काम करून दितात. पूण, बळिश्ट झगडपी आपली कांयच चूक ना अशें सांगून दुबळ्या कारधनया कडल्यान दुरुस्तीचो खर्च घेता. वयल्यान विमोय बोल्सांत उडयता. ताचे पयलीं तो फुडलो मनीस पळोवन केस्तांवां, मारामारीय करपाक फाटीं फुडें पळयना. अपघातांत कोण जखमी जालो जाल्यार सरभोंवतणचे लोक त्या ड्रायव्हराक कोणाची चूक हाचो विचार करिनासतना बडयतात. भोवतेक मोटारधनी अपघात जालो काय पळ काडटात, ते हाकाच लागून. शेनवारा रातीं सांतइस्तेंव जालें तें हेंच. तिडकीचेर नियंत्रण दवरिल्लें जाल्यार फुडलो अनर्थ टळपाचो.
अपघातांतल्यान वाटावल्ले चलयेन पुलिसांक दिल्ले म्हायती प्रमाण, तांचे गाडयेचो माशेलांत एके निळे मोटारीक धपको लागलो. उपरांत ते मोटारीन तांचो फाटलाव केलो. तेन्ना भियेवन गुजरातांतल्या ह्या तरणाट्यान इश्टीणी सयत पळ काडलो. वाट मेळटा थंयच्यान गाडी धोफरायली. मुखार आडवी न्हंय आशिल्ली. ताका घडये ती काळखांत रस्तो कशी दिसल्या आसुये…. आनी हांगाच तो संकश्टांत सांपडलो. मोटार सरळ उदकांत गेली. चलयेक पेंवपाक येतालें. तें दार उक्तें करून भायर सरलें आनी धडेर आयलें. तो तरणाटोय भायर सरिल्लो, तिणें पळयला. पूण उपरांत तो गायब जालो. ताका सोदपाचो यत्न काल रातीं मेरेन चलतालो. पुलीस ती निळी गाडीय सोदताले.
माशेलांत किरकोळ धपको बशिल्ले ते निळे गाडयेंत कोण आशिल्ले, तांणी फाटलाव कित्याक केलो, बुडिल्ल्या तरणाट्याक बडोवपाक, ताचे कडल्यान पयशे बी घेवपाक काय आनीक कित्याक, तांणी गाडयेंत चलयेक बी पळयिल्ली काय, कोण नशेंत बी आशिल्ले काय, ह्या प्रस्नांच्यो जापो अजून मेळूंक नात. पुलिसांचे चवकशेंत सगलें भायर सरतलेंच. सीसीटीव्ही कॅमेऱ्यांत ह्यो गाडयो दिसल्यात आसतल्यो. पुलीस सोद घेतात. घडये ते चलयेन ते गाडयेचो नंबरूय पळयला आसत. ती गाडी सांपडले उपरांत नेमकें कितें जालें, ताचेर आनीक उजवाड पडटलो. पूण, ह्या प्रकरणा फाटल्यान तिडक ही एक कारण आसतलीच. रागाक वखद ना, ही गजाल खरी आसली तरी त्या वेळार सगल्यांनीच स्वताचेर नियंत्रण दवरूंक जाय. नाजाल्यार करपाक गेलो एक आनी जालें भलतेंच, अशें घडले बगर रावना. सांतइस्तेंव एकल्याचो जीव गेलो. फाल्यां ते निळे मोटारकार सांपडकच त्रासांत पडटले. निमाणी फेरीबोट गेली काय फेरीधक्यांचेर रेडियम रंगयिल्ले बॅरिकेड्स दवरून वाट आडावप हो असल्या अपघातांचेर एक उपाय आसा.
मध्यानरातीं हेडपाचे प्रकारूय वाडल्यात. भायल्यान भुरगीं शिकपाक येतात काय फोल्गां मारपाक अशें कोणेंय म्हणल्यार वायट धरचें न्हय. हातूंत कांय शिक्षण संस्था बदनाम जाल्यात. हॉस्टेलांत रावपी ह्या भुरग्यांक भायर सोडप्यांचेर खरें म्हणल्यार खर कारवाय जावंक जाय. पुलिसांनीय हें प्रकार सोंसपाक जायनात. 18 वर्सां पिराये वयल्या चली, चल्याक कायदो सज्ञान मानता. पूण हाचो अर्थ तांणी मध्यानरातीं हेडप असो जायना. रातीं 10 मेरेन परतून येवपाक जाय. हॉस्टेलांचो वेळ कितलो मेरेन आसता? कांय हॉस्टेलांनी ड्रग्स पसून सांपडल्यात. नशेंत आशिल्ल्या विद्यार्थ्यांक धरल्यात पसून. गोंयांत आतां तरातरांच्या वृत्तींच्या लोकांचो रातच्या वेळार वावर आसता. खास करून दर्यांवेळांचेर. बलात्कार, खून पसून जाल्यात. घुंवळे वखदांच्या गैरवेव्हाराचेर नियंत्रण दवरपाचे यत्न फाटल्या 30- 40 वर्सां सावन चालू आसात. पूण तातूंत सरकारी यंत्रणेक व्हडलेशें येश मेळूंक ना. तेन्ना रातचीं जागरणां करपी वायट प्रवृत्ती पसून सगल्यांनीच सादूर रावचें. तरणाट्यांनी पबांत, क्लबांत जरूर वच्चें, पूण रातच्या दोन, तीनांक घरा वा हॉस्टेलांत परतूचें न्हय. गोंयांतले गुन्यांव आडावपाचो यत्न करपी पुलिसांनी वादग्रस्त शिक्षणीक संस्था, हॉस्टेल वाठारांत रातच्या वेळार पुलीस बंदोबस्त दवरल्यार बरो. निदान थंय सीसीटीव्ही कॅमेरे बसोवचे. पालकांनीय आपलीं भुरगीं कितें करतात, ताचो नियाळ घेवप गरजेचें.
सांतइस्तेंव प्रकरणांत गुजराती चलो बेपत्ता आसा. म्हणटकच भायर गोंयचें नांव बदनाम जातलेंच. आमचे खातीर तें मारक. गोंयची एक विशिश्ट प्रतिमा तयार जाल्या, ती बादक थारत आसा.