भांगरभूंय | प्रतिनिधी
नवी दिल्ली, खबरां संस्था : भारतीय रेल्वे हो संवसारांतलें चवथें व्हडलें रेल्वे नेटवर्क आनी आशियांतलें दुसरें व्हडलें. रेल्वेचें जाळें पयस पयस मेरेन पातळ्ळां. रेल्वेमार्गान प्रवास करप खूब सोंपें आनी सोयीचें आनी सगळ्यांक परवडपी आसा. दर दिसा कोट्यांनी प्रवासी देशभर रेल्वेंतल्यान प्रवास करतात. भारतीय रेल्वे प्रवाशांक वेगवेगळी सुविधा दिता. ते भायर भारतीय रेल्वेन १ एप्रील सावन म्हळ्यार आयच्यान रेल्वे च्या नेमांनी व्हड बदल केला.
ह्या नव्या रेल्वे नेमांक लागून तिकेट नासतना रेल्वेंतल्यान प्रवास करप प्रवाशांक खर्चीक थारूंक शकता. तिकेट नासतना रेल्वेंतल्यान भोंवतना धरल्यार आतां ऑनलायन दंड भरचो पडटलो. हे दंड भरपा खातीर डिजिटल तंत्रगिन्यानाचो वापर करून फुकट्या प्रवाशांचेर दंड घेवपाची पद्दत भारतीय रेल्वेन सुरू केल्या. आतां क्युआर कोड स्कॅन करून प्रवाशां कडल्यान दंड वसूल करतले. ते खातीर रेल्वे तिकीट निरिक्षकांक हातांत धरपाचीं टर्मिनल मशीनां दितले. प्रवास करतना तिकेट नासतना धरलो आनी रोख पयशे ना जाल्यार डिजिटल पेमेंट करूं येता आनी जेलींत वचप टाळूं येता.
तिकेट घेतना जायत्या जाणांक पेमेंट संबंदीत समस्या येतात. आतां प्रवाशांक रेल्वे स्टेशनां वयल्या तिकेट कावंटरां वयल्यान तिकेट घेतना क्यूआर कोड स्कॅन करपाचो पर्याय मेळटलो. हे खातीर प्रवाशांक गूगल पे आनी फोन पे सारक्या यूपीआय ऍपा वरवीं तांच्या सोयी प्रमाण पेमेंट करपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
