तिकेटय सूर्यनमस्कार घालून

भांगरभूंय | प्रतिनिधी

वन वे तिकेट द मून हें गीत डेव स्टिवर्ट हांचें. ब्रिटनांतल्या लेखकाचें हें इंग्लेज भाशेंतलें गीत आयजूय नामना जोडून आसा. तें गीत म्हणत वेंचणुके खातीर तिकेट, सॉरी उमेदवारी मेळोवपा पासत दिल्ली ते गल्ली मेरेन सूर्यनमस्कारय घालचे पडटात. सूर्यनमस्कार घालत खासदारच न्ही मुख्यमंत्री, उपमुख्यमंत्री, मंत्री जाल्ले भोव आसतले. सूर्यनमस्कार घालूंक खूब जाणांक वांगडा घेवन वचूंकच जाय अशें ना. कोण गेल्या आसत दिल्ली ? कोण आयल्यात गोंयांत? कोण वतले अयोध्या? खबरोच, खबरो. खबराकारांकय तिकेट जाय आसत व्हय? केन्ना- केन्ना खबरोच सांगतात चंद्राक हात लावपाक खबरांकारय तयार आसात म्हणून. ते खातीर दिमयो मोडप, उठाबशी काडप, सुटकेसीय हातांत घेवच्यो पडटात. खासदारकी मेळटकच एक सूटकेस दिल्ली, एक घरा गोंयांत आदीं आसताली. तेंपा प्रमाणे कुरपणे घालत सुटकेस आतां ल्हान, व्हड शोल्डर बॅग जाल्या, धरपाक, सांबाळपाक सोंपी.
वेंचणुको आयल्यो की सुटकेस, ब्रिफकेस संस्कृतायेच्यो काणयो, पुडयो सोडून दिवपीय आसतात. सिनियरांक त्यो परवडटात, ज्युनियरांनी पुडयोय सादूर रावन सोडच्यो. धोरण पाळपी, उतरां सांबाळून वापरपी, हातांत मोबायल, कागद घेवन उलोवपी, बरोवपी, रिकॉर्ड करुन घेवपी, नोंद दवरपी, नांवांची खात्री करुन घेवपी आयजय आसतले. चवथ्या खांब्याक आंगणांतले, सालांतले, तांदळाचे साक, पिशव्यो, बिर्याणी हळडी- कुकमा वेळार दिसतली. अचूक नांव, गांव आनी कोणूच रागार जावचीं ना, तिडक येवची ना अशी कॅप्शन, जस्ट इमेजिन.
माफ करात, विखुरिल्ल्या पानांनी फाटलें, फुडलें दितना अयोध्येचो कलश, अक्षता, पत्रिके विशीं सांगप म्हळ्ळ्यार फकत वातावरणाची निर्मणी. उजळणी सुरु जाल्या, पर्पल फेस्त, लोकोत्सव, परिक्षेच्या टायमटेबला उपरांत वेंचणुकेचें रों रों वारें व्हांवतलें. चड गर्दी, लायटी, माटवांतल्यान आडवेळार पावसय येता, वाऱ्या पावसाचे दीस नासतनाय. मळबांतल्या चंद्र, सूर्य, नखेत्रां मेरेन बेगीन भोंवडी करप, उलोवप, पालोवप पृथ्वी वेल्यान कशें जाता तें सिनेमांनी आदींच दाखयलां. उंचेल्या तांकीचें विज्ञान, तंत्रज्ञान गोंयांत हाडपा खातीर 2024 वर्सा लोकसभेर वचपी खासदारांक येत्न करना जाल्यार फुडारांत माफी ना.
अपात्रतायेच्या चपक्यांत शिरकून उरिल्ल्यांक, विधानसभा वेंचणुकेंत जैत न मेळिल्ल्यांकय लोकसभेर वचूंक मेळटा. अपात्रता, अपेसा मागीर आतांचे शेतकाम मंत्री रवी नायक हांची परतून उदेंत 1998 वर्सा लोकसभा वेंचणुकेंत जाली. रवीबाब फकत 417 मतांनी लोकसभेर पावले. फरक 500 परस उणो आशिल्ल्यान फांतोडेर 2 वरां मेरेन ते जिखिल्ल्याची घोषणा जावंक नाशिल्ली, पत्रकारांकय मतां मेजपी सभाघरांत रवीबाबाबराबर बसून रावचें पडलें. तेन्ना वेंचणुकेच्या मतांमेजपांच्यो खबरो करपाक आशिल्ल्या पत्रकारांक फांतोड, सकाळ, सांजवेळ नासताली. मतपत्रिका हातांनी मेजताले, उपरांत इलेक्ट्रॉनिक मतदानयंत्रां आयलीं, पयलींच्या यंत्रांनीय बदल जाल्यात. गोंयांत इलेक्ट्रॉनिक मतदान यंत्राचो पयलो प्रयोग श्रमिक पत्रकार संघटनेचे वेंचणुकेंत जाल्लो. रवीबाबांची कश्टांची जीण, वेंचणुके दिसाय कोणाच्याय खांद्यार हात घालून भोंवप आनी हेर खीण यादींतले. चड तेंप सत्तेत आशिल्ल्या विरुद्ध बंड, चुको करीत रवीबाब आयजय राजकारणांत तिगल्यात. वेवसाय, राजकी उत्तराधिकारी घडोवपाची देख तांचे कडल्यान घेवची.
वन नेशन वन इलेक्शन येतना पक्षांतरांचेर आळेबंद घालपी कायदो सुदारपा खातीर, संवसारांतल्या भारतीयांक आसा थंयच्यान मतदान करपाक मेळपाची सुविधा मेळपा खातीर तजवीज जाय. पयलींचे केंद्रीय कायदोमंत्री रमाकांत खलप, प्रदेश भाजपाचे म्हणयारे अॅड. यतिश नायक, आम आदमी पार्टीच्या गोंय फांट्याचे अध्यक्ष अॅड. अमित पालेकार, गोंय विधिकार मंच वन नेशन वन इलेक्शना खातीर सुचोवण्यो धाडटलेच. फुडले लोकसभे खातीर अॅड. यतिश, अॅड. श्रीनिवास खलप हाणीं तयारेक लागचें. प्रदेश काँग्रेसीचे माजी अध्यक्ष गिरीश चोडणकार एकचित्त जाल्यार जैत लागीं येतलें.
लोकसभेर गोंयच्यान वचपाची प्रदेश महिला काँग्रेसाध्यक्ष बिना नायक, माजी मंत्री संगिता परब, निर्मला सावंत हांची इत्सा आसतलीच. त्यो फायटर्स. म्हादय आमचीच कशी हें लोकसभेत सांगपाक स्त्रीशक्तीच योग्य. उषा सरदेसाय – गोवा फॉरवर्ड, प्रतिमा कुतिन्हो – आम आदमी पार्टी, मेधा परुळेकार, सावित्री कवळेंकार, सुलक्षणा सावंत – भाजपा विधानसभा, लोकसभेर आयज नाजाल्यार फाल्यां आसतल्योच. धरती पकड हांचेवरी गोंयांतल्यान लोकसभा वेंचणुकेंत देंवपाक हेर राज्यांतले आसतले? सूर्यनमस्कार घालूनच तिकेट मेळोवची पडटली,
अपक्षय व्हड मोलादिक. 2027
गोंय विधानसभेत जनरेशन नेक्स्ट
आसतलेंच. केंद्रीय मंत्री श्रीपादभाऊंचे पूत सिद्धेश, आदले मंत्री डॉ. सुरेश आमोणकार, पांडुरंग राऊत हांच्यो स्वयंसिद्धा धुवो ते पिळगेंतल्यो. जनरेशन नेक्स्टांत रिवोलुशनरी गोवन्सची क्रांती खंय आसतलीं? वाट दाखयतली?

सुहासिनी प्रभुगांवकार
9881099260