ताळ्यांत आडकल्लें हाड

भांगरभूंय | प्रतिनिधी

म्हणटकच जाहीर प्रचार सभांनी पित्रोदाच्या वक्तव्याचो मुद्दो येतलोच आनी काँग्रेसीक तो मारक थारतलो.

वेंचणुको आसतात, तेन्ना एकलो तरी मुक्ताफळां शिंवरता. फाटले वेंचणुकेंत काँग्रेसीचे मणिशंकर अय्यर हांणी प्रधानमंत्री नरेंद्र मोदी हांकां उद्देशून ‘ते xx मनीस’ अशें वक्तव्य केल्लें. तेन्ना व्हडलो बोवाळ जाल्लो. काँग्रेस विरोधकांनी अर्थांत हाचें भांडवल केल्लें. अय्यर हांच्या ह्या वाक्यान काँग्रेस समर्थक पसून बेजार जाल्ले. ताचो मतपेटयेचेरुय परिणाम जाला आसतलो. हे वेंचणुकेंत काँग्रेसीच्या सॅम पित्रोदा हांणी अय्यर हांचो उणाव भरून काडला. तांणी सगल्या भारतीयांक उद्देशून एक टिप्पणी केल्या. ताचोय काँग्रेस विरोधकांक बरो उपेग जाला. उलयतना अशीं उतरां नकळटां भायर सरतात, काय हे फुडारी मुद्दाम तशे उलयतात, तें कळना. पूण फटकळ उलोवपी फुडारी सत्ताधारी आनी विरोधक, दोनूय वटेन बरेच आसात. दुदांत मिठाचो खडो उडोवचो तसलो हो प्रकार. मागीर माफी मागून कांय उपेग नासता. कारण समाजमन दुखावल्लें आसता.
सॅम पित्रोदा नेमकें कितें उलयले? एका दिसाळ्याक दिल्ले मुलाखतींत तांणी सांगलें, आमच्या देशांत विवीधताय आसा. पूर्वे कडेन रावपी भारतीय चीनी लोकां सारके दिसतात. उत्तरे कडले गोऱ्या लोकां सारके, पश्चिमेक रावपी अरबां सारके आनी दक्षिणे कडले आफ्रिकन लोकां सारके दिसतात. पूण आमी सगले इतल्या व्हडल्या लोकशाय देशांत मोग, भावचारान रावतात. तांचें दुसरें एक वक्तव्य आशिल्लें, अमेरिकेंत दायज कर आसा. थंय मनीस मेलो काय ताणें जोडिल्ली 45 टक्के रक्कम घरच्यांक मेळटा आनी उरिल्ली 55 टक्के सरकाराक दायज कर म्हूण मेळटा. ही पद्दत भारतांत लागू केल्यार समाजांतली असमानताय ना जातली.
दायज करा वयल्यान काँग्रेस अडचणींत आयली. गळ्यांतलें मंगळसुत्र पसून काँग्रेस काडून घेतली आनी मुस्लिमांक दितली, अशी टिका भाजपान केली. तुमी घाम गळोवन जोडपाचें आनी तें सगळें सरकारान घेवपाचें, हो कसलो न्याय, असो प्रस्नूय कांय जाणांनी केलो. ह्या वक्तव्याचो काँग्रेस विरोधकांक बरोच फायदो जालो. पित्रोदा हांचें हें वक्तव्य हवेंत विरघळटा म्हणसर हें वर्णद्वेशी वक्तव्य आयलां. फाटले चार दीस ताचेरुय बोवाळ चल्ला. आतां पित्रोदान इंडियन ओव्हरसीज काँग्रेसीच्या अध्यक्षपदाचो राजिनामो दिला. राॅबर्ट वाध्रा सयत कांय काँग्रेस फुडाऱ्यांनी पित्रोदाच्या वक्तव्या वयल्यान टिका केल्या. तें तांचे वैयक्तीक मत, अशेंय थोड्यांनी म्हणलां. पूण, बुंद से गयी वो हौद से नहीं आती , हे बिरबलाचे काणये प्रमाण आतां हो प्रकार जाला.
भारतांत आर्य भायल्यान आयले, अशें एक विधान जायते जाण करतात. म्हणल्यार उत्तर भारतांतले ते आर्य आनी दक्षिणे कडले द्रवीड. पित्रोदा हांणी तर रंगा वयल्यान भारतीयांची वांटणी केली. भारतांत चीन, अरब, आफ्रिकन, ब्रिटीश आनी हेर देशांचेय लोक आसात. तांणी हांगां नातेसंबंद जोडल्यात. आदल्या तेंपार पारशीय आयल्यात. हबशी, सिद्धी ह्यो आफ्रिकन जमातीय हांगा आयल्यात. स्थायीक जाल्यात. भारताचे उदरगतींत तांणी योगदान दिलां. पूण सरसकट भारतीयांचे अरबी, आफ्रिकन, चीनी अशे वांटे घालप हो वर्णद्वेशी थोमणो जालो. सगल्या भारतीयांचो हो अपमान. पित्रोदान खरें म्हणल्यार माफी मागपाक जाय. उलोवपाच्या नादांत आपूण कितें उलयतां, ताचें तांकां भान उरूंक ना जातलें. काय ते मुद्दाम उलयल्यात?
प्रधानमंत्री नरेंद्र मोदी हाणी तेलंगणांतले सभेंत सांगलें, ‘म्हाका कोणे गाळी संवल्यार राग येना. तें हांव सोंसता. पूण राजपुत्राच्या तत्वज्ञानान (म्हणल्यार पित्रोदान) म्हाका इतल्यो गाळी संवल्यात, ताचो म्हज्या मनांत राग आसा. म्हज्या देशांत कातीच्या आदारान गुणवत्ता थारयतले?’ अजून मतदान जावपाचें आसा. म्हणटकच जाहीर प्रचार सभांनी पित्रोदाच्या वक्तव्याचो मुद्दो येतलोच आनी काँग्रेसीक तो मारक थारतलो. सध्या पित्रोदा हे काँग्रेसीच्या ताळ्यांत आडकल्लें हाड जाल्यात, हातूंत
दुबाव ना.
सॅम पित्रोदा हांचें मूळ नांव सत्यनारायण गंगाराम पित्रोदा. ते गुजरातांतले. अमेरिकेंत उच्च शिक्षण घेतकच तांणी 1965 सावन ते दूरसंचार मळार काम केलें. 1981 ते भारतांत परतले. तेन्नाच प्रधानमंत्री राजीव गांधी हांच्या निमंत्रणा वयल्यान तांणी सी-डोट (सेंटर फाॅर डेव्हलपमेंट आॅफ टेलिमॅटिक्स) स्थापना केली. उपरांत ते गांधी हांचें सल्लागार जाले. (डाॅ. मनमोहन सिंग हांचेंय ते सल्लागार आशिल्ले.) भारतीय ज्ञान आयोगाचे अध्यक्ष, दूरसंचार आयोगाचे संस्थापक आनी अध्यक्ष म्हूण तांणी काम केलां. देशाच्या खाची कोनशांनी फोन आनी उपरांतच्या काळांत इंटरनेट पावलें तातूंत पित्रोदा हांचें व्हडलें योगदान आसा. तांकां म्हायती क्रांतीचे जनक मानतात. हालींच्या काळांत तांकां राहुल गांधीचे राजकी गुरू म्हूण पाचारतात. एक कर्तृत्ववान मनीस अचकीत व्हांवतकच कितें जाता, ताचें सॅम पित्रोदा हें एक उदाहरण.