भांगरभूंय | प्रतिनिधी
पणजीः ताळगांवां रस्त्यार अतिक्रमण करपी पसर्यांचेर बांदकाम खातें आनी पंचायतीन जोड कारवाय करीत ते मोडून उडयले. उच्च न्यायालयान दिल्ल्या आदेशांक पाळो दीत ही कारवाय केल्या.
रस्त्यार तेंकून आशिल्लीं अतिक्रमण केल्लीं सगळीं बांदकामां तशेंच सरकारी आनी कोमुनिदाद सुवातेर अतिक्रमण करून बांदिल्ल्या घरांची पळोवणी करून तांचेर कारवाय करची असो आदेश उच्च न्यायालयान ह्या प्रकरणाची स्वेच्छा दखल घेवन दिल्ले. उच्च न्यायालयाच्या आदेशांक पाळो दित ताळगांवां सेंट मायकल स्कुला कुशीक रस्त्यार आयल्ल्या अतिक्रमण करपी फास्ट फूडाचो गाडो बांदकाम खात्यान थळावे पंचायतीचे मजतीन मोडून उडयलो. ह्या वेळार पोलिसांची फौज हजर आशिल्ली आनी अधिकार्यांचे देखेरेखी खाला हें बांदकाम मोडून उडयलें.
मजगतीं, पयलीं कसलीच नोटीस दिनासतना हें बांदकाम मोडपाचें काम हातांत घेतलां तशेंच ह्या रस्त्यार कितलींशींच अशीं बांदकामां आसात जीं रस्त्यार आयल्यांत. मात फकत तांच्याय बांदकामां कडेन अधिकार्यांनी लक्ष केलां, अशें बांधकामाच्या धनयान सांगलें.
उच्च न्यायालयान दिल्ल्या आदेशा प्रमाण रस्त्यार अतिक्रमण करून बांदिल्ले पसरे तशेंच गाडयां आड भौशीक बांदकाम खात्यान मोहीम सुरू केल्या. खात्यान दिसाळ्या वरवीं भौशीक बांदकाम खात्यान कळोवणी उजवाडाक हाडून रस्त्यार अतिक्रमण करून बांदिल्ले सासणाचे तशेंच तात्पुरते पसरे, गाडे, हातगाडे, स्टोलां २१ मे पयलीं काडून उडोवपाचे निर्देश दिल्ले. उच्च न्यायालयान दिल्ल्या आदेशा प्रमाण आनी खात्याच्या परिपत्रका प्रमाण चलत वचप्यांक आनी वाहन चालकांक त्रास दिवपी, आडखळ हाडपी ही अतिक्रमणां काडपाक अपेशी थारल्यार २५ मे उपरांत उच्च न्यायालायच्या आदेशा प्रमाण हाची फुडली कारवाय करतले, अशी सुचोवणी खात्यान दिल्ली.
हीं बांदकामां रायट आॅफ वे भितर येतात आनी कांय रस्त्यांची जमीन संपादन प्रक्रिया चालू आसा. तशेंच रस्त्यार कुशीक बांदकाम करतना रस्तो आनी बांदकाम हांचे मदीं तीन मिटर सुवात सोडप गरजेचें आसा. हे फाटभूंयेर पंचायत, पालिका आनी अतिक्रमण करप्यांनी हे गजालींची नोंद घेवची, अशें सांगून फुडाराक कसलीच सुचोवणी दिवचे नात, अशी शिटकावणी खात्यान दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
