भांगरभूंय | प्रतिनिधी
पणजी ः ताळगांवां अपहरणाचो यत्न करपाची घडणूक घडली. शाळेंतल्यान परततना दोग जाणांनी 12 वर्सांच्या चल्याक बळयां गाडयेंत बसोवपाचो यत्न केलो. ही घडणूक 21ऑक्टोबराक दनपरां सुमार 12.15 वरांचेर घडली.
गाडयेंतल्यान आयिल्ल्या दोगां मनशां मदल्या एकल्यान मास्क घाल्लो. तांणी भुरग्याक धरलो आनी गाडयेंत ओडपाचो यत्न केलो. तेन्नाच थंय एकलो मनीस आपले स्कुटरी वेल्यान आयलो आनी तांकां विचारलें, कितें चल्लां? हें आयकून ते दोगूय दुबावीत भियेले आनी तांणी गाडयेन यु टर्न घेवन थंयच्यान पळ काडलो.
त्या चल्यान घरा वचून आपल्या बापायक घडिल्लो प्रकार सांगलो. भुरगो इतलो भियेल्लो, ताका गाडयेचो नंबर दिसूंक ना आनी तो गाडीय वळखुपाक शकलो ना.
हे घडणुके उपरांत त्या चल्याच्या कुटुंबान रोखडीच पणजे पुलीस स्टेशनांत कागाळ केली. कागाळेच्या आदारार पुलिसांनी तपास करपाक सुरवात केल्या. दुबावितांचो सोद घेवपा खातीर पुलीस आशिकुशीकचे सिसीटीव्ही कॅमेरे तपासतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
