ताळगांवां उज्याचे घडणुकेंत तज्ञ समिती निवडची

भांगरभूंय | प्रतिनिधी

ताळगांवच्या थळाव्यांचें पंचायतीक निवेदन

पणजीः ताळगांवां शेतांक लागिल्ल्या उज्याचे घडणुकेची चवकशी करपा खातीर तशेंच अश्यो घडणुको फुडाराक जावच्यो न्हय हे खातीर तज्ञ समिती गठीत करची. उज्याच्यो घडणुको आडावपा खातीर सगळ्या खात्यांचो समन्वय घडोवन हाडप गरेजेचो, अशी मागणी करपी निवेदन ताळगांवच्या थळाव्यांनी पंचायत सचिवांक बरयलां.
ताळगांवां सुक्या तणाक उजो लागून शेतांक पेट घेवपाच्यो घडणुको सदच्यो जावन पडल्यात. हालींच सोमारा जाल्ले उज्याचे घडणुकेक लागून ३० थळाव्यांक धुंवराचो त्रास जावन तांकां सुरक्षीत जाग्यार व्हेले. नेटान मारपी वारो आनी गरमेक लागून उज्याची खराय वाडली आनी उजो पालोवपी दळाक उज्याचेर नियंत्रण मेळोवपा खातीर स वरां यत्न करचे पडले.
हे घडणुकेचे फाटभुयेंर ताळगांवच्या थळाव्यांनी ताळगांव पंचायतीच्या सचिवांक पत्र बरोवन ह्या विशयांत लक्ष घालून कृती करची अशी मागणी केल्या.

निवेदनांत थळावी सेसील रोड्रीग्स हांणी बरयलां, ह्या उज्यांत शेतकरांच्या पिकाचो लासून गोबर जावन तांचें भरपूर लुकसानण जालें. तशेंच ह्या उज्याक लागून धुंवर घरांनी घुसलो आनी लोकांक स्वास घेवपाक त्रास जाल्ल्यान तांकां सुरक्षीत थळार व्हेले. ह्या उज्याक लागून शेतांत सोरोप आनी बारीक जिवाणीं लासून गेलीं.
ह्यो उजाच्यो घडणुको सदच्यो जावन पडल्यात आनी हांवें स्वता हे घडणुके आड कितलेच फावट ग्रामसभेंत आवाज काडला. मात काल जी घडणूक घडल्या ही एक धोक्याची घंटा आसा आनी ताळगांवां अरसुरक्षीत वातावरण थारावपाक मजतीची अपेक्षा आसा. ह्या घडणुकांक लागून खूबशे फामिलींक आपल्या भुरग्यां वांगडा घराभायर धावचें पडटा. तशेंच आमच्या गांवांत जाण्टे लोक एकटे रावतात, अशें सेसील हांणी सांगलें.
देखून ह्यो उजो लागपी घडणुकां फाटलें कारण सोदून आनी फुडाराक ह्यो घडणुको जावचो न्हय हे खातीर तज्ञ समिती निवडची. तशेंच मे-एप्रिलांत जावपी उज्याचे घडणुकेच्या समस्येंत तेन्नाच लक्ष घालचें. सगळ्या संबंदीत खात्याक एकठांय हाडून तांचो तज्ञ सल्लो घेवचो. तशेंच सगळे थळावे एकठांय येवन आपलें योगदान ह्यो उज्याच्यो घडणुको आडवपा खातीर तयार आसात, अशें सेसील हांणी म्हणलें.