भांगरभूंय | प्रतिनिधी
भांगरभूंय । प्रतिनिधी
पणजीः ताळगांवचो नावाडगो गुन्यांवकार सूर्यकांत कांबळी ऊर्फ सूर्या हाचेर सोमाराक रातयां टोंक- करंजाळे हांका बुरखो घालून आयिल्ल्या अनवळखी हल्लेखोरांनी धारदार शस्त्रान हल्लो केलो. गंभीर जखमी जाल्ल्यान ताका उपचारा खातीर बांबोळी जीएमसीत दाखल केलां.
पयलीं पसून आशिल्ले दुस्मानकायेंतल्यान व्हो हल्लो केल्ल्याचो दुबाव पणजी पुलिसांनी उक्तायला. गुन्यांवकारींतल्यान सूर्याचें जायते जाणा कडेन दुस्मानकाय आशिल्ली. तातूंतल्यान सोमाराक ताचेर हल्लो जावपाक शकता, पुलीस निरीक्षक निखील पालेकार हाच्या मार्गदर्शना खाला उपनिरीक्षक मयूर पणशीकार ह्या प्रकरणाचो तपास करता. दुबावितांक ताब्यांत घेतल्या उपरांत हल्लो किद्या खातीर केलो हें स्पश्ट जातलें अशें पणजी पुलिसांनी मंगळारा पत्रकारांक सांगलें.
उत्तर गोंयांतल्या खाप्या गुन्यांवकाराचे वळेरेंत सूर्याचें नांव आसा. जितें मारपाची धमकी दिवप, मारपेट करप, शस्त्र बाळगुवप, हल्लो करप ह्या सारक्या गुन्यांवाक लागून वेगवेगळ्या पुलीस स्टेशनांत ताच्या आड गुन्यांव नोंद आसात. ताचेर पणजी पुलीस स्टेशनांत चार तशेंच पेडणे, दिवचल, कळंगुटे आनी साळगांव पुलीस स्टेशनांत दरेकी एक मेळून वट्ट 8 गुन्यांव नोंद जाल्ले कडेन आसात.
कळंगुटे हांका कांय वर्सां आदी जाल्ले मारपेट प्रकरणांत सूर्याक अटक केल्ली. 2021 वर्सा ताळगांव हांगा पॉल क्रूझ हाचे चाकू हल्लो केल्ले खातीर ताका अटक जाल्ली. ताळगांव सयत राज्यांत हेर कडेन जाल्ले गुन्यांवगारी प्रकरणांत ताचें नांव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
